မကွေးတိုင်း၊ ရေစကြိုမြို့နယ်ရှိ ရှင်မတောင်ပေါ်သို့ ရိက္ခာလာပို့သည့် စစ်ကောင်စီယာဥ်ကို အသွားအပြန်နှစ်ကြိမ် တိုက်ခိုက်ခဲ့ကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)ပြန်ကြားရေးတာဝန်ခံက ပြောသည်။
တပ်မ(၁၀၁)မှ စစ်ကောင်စီတပ်သားများနှင့် ဆင်ချောင်းရွာမှ ပျူစောထီးများသည် အင်အား ၇၀ ခန့်ဖြင့် ဇူလိုင် ၂၄ ရက်က ရေစကြိုမြို့နယ် ရှင်မတောင်တောင်ပေါ်သို့ ရိက္ခာပို့ရန် ဖောကား နှစ်စီးဖြင့် ထွက်လာခဲ့သည်။
အဆိုပါ ယာဥ်နှစ်စီးကို ထန်းတိုကျေးရွာနှင့် ချင်းယားကုန်းကျေးရွာကြားတွင် ပဒေသာမိုင်းဖြင့် နှစ်ကြိမ် မိုင်းဆွဲတိုက်ခိုက်ခဲ့ကြောင်း ရေစကြို(ပကဖ)ပြန်ကြားရေးတာဝန်ခံက ပြောသည်။
တိုက်ခိုက်မှုတွင် စစ်အုပ်စု ဒဏ်ရာများရရှိသလို ကားတစ်စီးလည်း ပျက်စီးသွားကြောင်း ရေစကြို(ပကဖ)က ဆိုသည်။
“ကားပျက်သွားတော့ တောင်ပေါ်ထိမတက်နိုင်တော့ဘဲ လမ်းမှာတင် ရပ်ထားတယ်။ တောင်ပေါ်ကနေ ကားသေးနဲ့ရိက္ခာတွေလာကဲ့(သယ်)တယ်”ဟု ရေစကြို(ပကဖ) ပြန်ကြားရေးတာဝန်ခံက ပြောသည်။
အဆိုပါစစ်အုပ်စုသည် ဇူလိုင်၂၆ရက် နံနက်ပိုင်းတွင် ရိက္ခာများပို့ဆောင်ပြီးနောက် ရှင်မတောင်ပေါ်မှ ဆင်းလာခဲ့သည်။
နံနက်၇နာရီ ၁၅မိနစ်ခန့်တွင် ချင်းယားကုန်းနှင့်ထန်းတိုကျေးရွာကြားအရောက်တွင် ရဲဘော်များနှင့် နာရီဝက်ကြာ အနီးကပ်အပြန်လှန်ပစ်မှုများဖြစ်ပွားခဲ့ကြောင်း ရေစကြို(ပကဖ)က ပြောသည်။
“ကျွန်တော်တို့ထောင်ထားတဲ့ ပွိုင့်တွေ ရှေ့ဆုံးကလျှောက်လာတဲ့ ခုနစ်ယောက်လောက်က တွေ့သွားတယ်။ သုံးယောက်က သွားဖြုတ်တယ်။ အဲဒီအချိန် ကျွန်တော်တို့က လက်ဦးမှုယူလိုက်တယ်။ သုံးယောက်ကနေရမှာတင် မှောက်သွားတယ်။”ဟု ၎င်းက ပြောသည်။
ထို့အပြင် အများအပြားလည်း ထိခိုက်ဒဏ်ရာများရရှိသွားပြီး ရဲဘော်များအထိခိုက်မရှိဆုတ်ခွာနိုင်ခဲ့ဟုလည်း အသိပေးသည်။ သို့သော် စစ်အုပ်စုဘက်က ထိခိုက်မှုနှင့်ပတ်သက်ပြီး လူထုနွေဦးက သီးခြားအတည်ပြုနိုင်ခြင်း မရှိပေ။
စစ်ဆင်ရေးကို ပြည်သူ့ကာကွယ်ရေးတပ်ဖွဲ့ – ရေစကြိုမြိုနယ်(ပကဖ)နှင့် ပခုက္ကူခရိုင်တပ်ရင်းအမှတ်(၉)တို့ပူးပေါင်းတိုက်ခိုက်ခဲ့ကြောင်း အသိပေးထားသည်။
ရေစကြို(ပကဖ)သည် ဇူလိုင် ၂၂ ရက်ကလည်း သူဌေးကုန်းကျေးရွာသို့ တပ်စွဲရန်လာသည့် စစ်ကောင်စီတပ်ကို ဒရုန်းဖြင့် ဗုံးချတိုက်ခိုက်ခဲ့သေးသည်။
