စစ်ရှောင်အဘိုးအိုတစ်ဦး အမောဖောက်သေဆုံး
စစ်ကိုင်းတိုင်း၊ ခင်ဦးမြို့နယ်တွင် စစ်ကောင်စီတပ်စစ်ကြောင်းထိုးနေ၍ ဒေသခံတစ်သောင်းခန့် မိုးထဲရေထဲ ထွက်ပြေးတိမ်းရှောင်နေရပြီး စစ်ရှောင်အဘိုးအိုတစ်ဦး အမောဖောက်သေဆုံးခဲ့ရကြောင်း သတင်းရရှိသည်။
ယနေ့ (သြဂုတ်၂၃ရက်) နံနက်ပိုင်းက ရေဦးမြို့မှ ခင်ဦးမြို့နယ်အနောက်တောင်ပိုင်း ရောက်ရှိလာသော အင်အား ၁၀၀ကျော်ပါ စစ်ကောင်စီ ခြေလျင်စစ်ကြောင်းထိုးလာခဲ့သည်။
အဆိုပါ စစ်ကြောင်းကြောင့် ကျေးရွာ ၁၁ရွာမှ ဒေသခံ တစ်သောင်းခန့် မိုးထဲရေထဲ ထွက်ပြေးတိမ်းရှောင်နေရကြောင်း၊ ထို့အပြင် မရမ်းအင်းကျေးရွာမှ အသက်(၅၇)နှစ်အရွယ် ဦးတင့်သည် လက်နက်ကြီးငယ် ပစ်ခတ်သံများကြောင့် အမောဖောက် နှလုံးရပ်ကာ သေဆုံးသွားခဲ့ကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
![(ထွက်ပြေးတိမ်းရှောင်လာရသော ပြည်သူများအား တွေ့ရစဥ်။ ဓာတ်ပုံ-ခင်ဦးမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/08/368246525_634736312058498_9024209582981356800_n.jpg?resize=720%2C405&ssl=1)
“ရေဦးက ထွက်လာတဲ့စစ်ကြောင်းက အောင်လံအခြေစိုက် ခလရ(၇၁)ပါ။ ညနေပိုင်းမှာ သဲကုန်းကြီးနဲ့ အင်းပေါက်ရွာမှာတပ်စွဲထားတယ်။”ဟု ဒေသတွင်း ပြည်သူ့ရဲဘော်တစ်ဦးက ပြောသည်။
အဆိုပါ စစ်ကြောင်းကြောင့် ယနေ့ညပိုင်းအထိ နေရပ်မပြန်ကြရသေးဘဲ မိုးရွာနေသည့်ကြားက တိမ်းရှောင်နေကြရကြောင်း၊ ကလေးသူငယ်နှင့် သက်ကြီးရွယ်အိုများ၊ကိုယ်ဝန်ဆောင်သွေးနုသားနု မိခင်များလည်း ပါဝင်နေ၍ အခက်အခဲများ ရင်ဆိုင်နေရကြောင်း သိရသည်။
![(ထွက်ပြေးတိမ်းရှောင်လာရသော ပြည်သူများအား တွေ့ရစဥ်။ ဓာတ်ပုံ-ခင်ဦးမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/08/369259419_634736265391836_1758301920974654644_n.jpg?resize=720%2C540&ssl=1)
လက်ရှိစစ်ရှောင်များ၏ အခက်အခဲများအတွက် ကူညီလှူဒါန်းလိုပါက ခင်ဦးမြို့နယ် သတင်းမှန်ပြန်ကြားရေး စာမျက်နှာသို့ လာရောက်ဆက်သွယ်နိုင်ကြောင်း အသိပေးထားသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA)၏ ဧပြီ၁၉ ရက်က ထုတ်ပြန်ချက်အရ မြန်မာနိုင်ငံတွင် လက်နက်ကိုင် ပဋိပက္ခကြောင့် အိုးအိမ်စွန့်ခွာ ထွက်ပြေးနေရသူ တစ်သန်းရှစ်သိန်းကျော် ရှိပြီဟု သိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)