မြင်းခြံတွင် စစ်တပ်က ကျေးရွာများစစ်ကြောင်းထိုးပြီး ပြည်သူနှစ်ဦးကို သတ်ဖြတ်

မန္တလေးတိုင်း၊ မြင်းခြံမြို့နယ်အရှေ့ပိုင်းတွင် စစ်ကောင်စီစစ်ကြောင်းက ကျေးရွာများအားစစ်ကြောင်းထိုးကာ ပြည်သူပိုင်ပစ္စည်းများအား အဓမ္မသိမ်းယူနေပြီး ​၅ရက်အတွင်း ဒေသခံပြည်သူ နှစ်ဦးကိုလည်း သတ်ဖြတ်ခဲ့ကြောင်း ဒေသခံများက ပြောသည်။

ဩဂုတ်၂၂ရက်မွန်းလွဲပိုင်းက မြင်းခြံမြို့နယ်၊ ကုက္ကဲဈေးတန်းသို့ ဈေးဝယ်သွားသည့် တပ်ကျေးရွာမှ ရွာသားတစ်ဦးအား စစ်ကောင်စီတပ်၏ ပစ်ခတ်မှုကြောင့် သေဆုံးခဲ့ရကြောင်း ဒေသတွင်းသတင်းရင်းမြစ်များက ပြောသည်။

“လက်ကျည်ထိမှန်လို့ ဆိုင်ကယ်ပြန်လှည့်မောင်းပြေးရာက ပဲစိမ်းငုံခင်းထဲမှာ ပစ်သတ်ခံခဲ့ရတာလို့သိရပြီး အလောင်းပြန်မပေးဘူးလို့ သိရပါတယ်”ဟု မြင်းခြံလူထုလှုပ်ရှားမှုကော်မတီအဖွဲ့ဝင်တစ်ဦးက ပြောသည်။

သြဂုတ် ၁၈ရက် မွန်းလွဲပိုင်းကလည်း ပျားရွာအနီးတွင် စစ်ကောင်စီတပ်က ပြည်သူတစ်ဦးအား သတ်ဖြတ်ပြီး အလောင်းအား PDF ယူနီဖောင်းဖြင့် အုပ်သွားကြောင်း ဒေသခံများက ပြောသည်။

ထို့အပြင် သြဂုတ် ၁၉ ရက်​ကလည်း မြင်းခြံမြို့နယ်၊ ရွှေပေါ်ကျွန်းကျေးရွာမှ စိတ်ကျန်းမာရေးမကောင်းသူ အမျိုးသားတစ်ဦးကို လိုက်လံပစ်ခတ်ခဲ့ကြောင်း သိရသည်။

စစ်ကောင်စီတပ်သည် ယခုရက်ပိုင်းအတွင်း မြင်းခြံမြို့နယ်အရှေ့ပိုင်း၌ အဖွဲ့များခွဲကာ စစ်ကြောင်းထိုးနေကြောင်း၊ ထို့အပြင် တောင်ပုံရွာသား နှစ်ဦး၊ မီးပေါက်ရွာမှ လင်မယားနှစ်ဦးတို့အား ဖမ်းဆီးသွားကြောင်း သိရသည်။

စစ်ကောင်စီတပ် စစ်ကြောင်းထိုးချိန်တွင် တွေ့ရှိသည့် တောင်ယာတောလုပ်ငန်းလုပ်နေသူများအား ရိုက်နှက်ကာ ဖုန်းဆင်းကဒ်များ ဖြုတ်ယူခြင်း၊ စစ်ကြောင်းတလျှောက်ကျေးရွာများအား ဝင်ရောက်ကာ ဖုန်းနှင့်ပိုက်ဆံများ အဓမ္မသိမ်းယူခြင်းများ ပြုလုပ်နေကြောင်း ဒေသခံများက ပြောသည်။

မီးပေါက်ရွာတွင် ဖုန်း၁၈လုံး၊ ဆိတ်ကုန်းရွာက ဖုန်း၂၂လုံးယူဆောင်သွားကြောင်း၊ ထို့အပြင် ဆိတ်ကုန်းရွာ နေအိမ်တစ်အိမ်မှ ၁၈သိန်းကျပ်နှင့် ရွှေ၊ငွေများပါ ယူဆောင်သွားကြောင်း မြင်းခြံလူထုလှုပ်ရှားမှုကော်မတီက ပြောသည်။

မြင်းခြံမြို့နှင့် မြို့အနီးဝန်းကျင်တွင် စစ်ကောင်စီတပ်လက်အောက်ခံ ပျူစောထီးများကလည်း ပြည်သူအချို့၏ နေအိမ်များကို ဝင်ရောက်ပြီး လက်နက်ပြခြိမ်းခြောက်ကာ ငွေတောင်းခံမှုများ ဖြစ်ပွားနေကြောင်း၊ သြဂုတ် ၁၄ ရက်ညကလည်း ရှားတောရွာရှိ နေအိမ်တစ်အိမ်ကို လက်နက်ကိုင်ပျူများ ဝင်ရောက်လာပြီး ခြိမ်းခြောက်ကာ ကျပ် ၅သိန်းတောင်းယူသွားကြောင်း သတင်းရရှိသည်။