ရဲခေါင်/People’s Spring
ဒီးမော့ဆိုမြို့နယ် ရှိ စစ်ကောင်စီစခန်းနှစ်ခုကို စက်တင်ဘာ ၂ရက်တွင် တိုက်ခိုက်သိမ်းနိုင်ခဲ့ကြောင်း ဒီးမော့ဆို PDF တာဝန်ရှိသူက လူထုနွေဦးသို့ ပြောသည်။
အင်အား ၅၀ ထက်မနည်းရှိသော စစ်ကောင်စီ စခန်းနှစ်ခုကို ကရင်နီတော်လှန်ရေးတပ်ပေါင်းစုက ပူးပေါင်း တိုက်ခိုက်ခြင်းဟု သိရသည်။
“သေးဆူလဲ၊ပူဖားက စကစ စခန်းနှစ်ခုကို ဒီမနက်သိမ်း လိုက်တယ်။ လက်နက်ခဲယမ်းတွေရတယ်။ မြေပြင် ရှင်းလင်းရေးပြီးမှ ကျန်တာ အသေးစိတ် ထုတ်ပြန်ပါ့မယ်”ဟု အ
ထက်ပါတာဝန်ရှိသူက People’s Sping သို့ပြောသည်။
ယမန်နေ့ နံနက် ၄ နာရီကျော်ကစ၍ ဖြစ်ပွားခဲ့သည့် တိုက်ပွဲတွင် စစ်ကောင်စီက တိုက်လေယာဥ်ဖြင့် လေးကြိမ်ထက်မနည်း ဗုံးကျဲ တိုက်ခိုက်ခဲ့ပြီး လွိုင်ကော် အခြေ စိုက်တပ်များက လက်နက်ကြီး ပစ်ကူများစွာပစ်ကူပေးခဲ့သည့်ကြားမှ ကရင်နီ ပူးပေါင်းတပ်များက စခန်းနှစ်ခုကိုသိမ်းပိုက်နိုင်ခဲ့ခြင်းဖြစ်သည်။
တိုက်ပွဲအတွင်း နှစ်ဖက် ထိခိုက်ကျဆုံးမှုများကိုမူ မြေပြင် စာရင်းကို စိစစ်နေဆဲဟု ကရင်နီပူးပေါင်းတပ်ဖွဲ့ဝင်တစ်ဦးက အသိပေးသည်။
“စခ စခန်းတွေကို သိမ်းပြီ ဆိုကတည်းက ထိခိုက် ကျဆုံးမှုတွေတော့ရှိတယ်။နည်းပါတယ်။သူတို့ဆီက လက်နက်နဲ့ အလောင်းတွေရတာရှိတယ်။အဲဒါတော့ တပ်တွင်းစည်းအရ သူတို့ ထုတ်ပြန်ပါလိမ့်မယ်”ဟု ၎င်းကဆက် ပြောသည်။
စစ်ကောင်စီတပ်စွဲထားခဲ့သည့်ဒီးမော့ဆိုမြို့နယ် အနောက်ခြမ်းရှိ ကုန်းသာ၊သေးဆူလဲ၊ပူဖားနှင့်ဒေါကမီးကျေးရွာများကို ၂၀၂၂ နိုဝင်ဘာ လနောက်ဆုံးပတ်က ကရင်နီတပ်ပေါင်းစုက ပူးပေါင်းစစ်ဆင်ရေးဆင်နွှဲခဲ့ဖူးသည်။
ကရင်နီပူးပေါင်းတပ်ဖွဲ့၏ ပူးပေါင်းတိုက်ခိုက်မှုကြောင့် စစ်ကောင်စီတပ်များသည် ၄င်းတို့ တပ်စွဲထားသော ကျေးရွာများမှ ဆုတ်ခွာခဲ့ရသည်။
သို့သော် လက်နက်ကြီးပစ်ကူအပါအဝင် လေကြောင်း တိုက်ခိုက်မှုများကြောင့် စစ်ကောင်စီက ကုန်းသာ၊သေဆူးလဲ၊ပူဖား ဒေသတစ်ဝိုက်ကို ယခုနှစ်ဆန်းပိုင်းတွင် ပြန်လည်တပ်စွဲခဲ့ခြင်းဖြစ်သည်။
