ကောလင်းမြို့ကို PDF များနှင့် မဟာမိတ်တပ်များက သိမ်းပိုက်နိုင်ပြီးနောက် စစ်ကိုင်းတိုင်းအတွင်းရှိ စစ်ကောင်စီတပ်များ ထိတ်လန့်ပြီး ပြာယာခပ်နေနေကြောင်း ဒေသခံများနှင့် တော်လှန်ရေးအင်အားစုများကပြောသည်။
“ကောလင်းသတင်းကြားပြီးတော့ ကသာ ခမရ ၃၀၉ ထဲ လန့်နေကြတယ်။ ဗုံးခိုကျင်းတွေ ထတူးနေကြတယ်” ဟု ကသာမြို့မှ ဒေသခံတစ်ဦးကပြောသည်။
အလားတူ ကောလင်းမြို့နှင့် ထိစပ်နေသော ဝန်းသိုမြို့တွင်လည်း စစ်ကောင်စီတပ်စခန်းများအတွင်း ပုံမှန်အခြေအနေမဟုတ်ဘဲ ရှုပ်ထွေးနေကြောင်း မြို့ခံများကပြောသည်။
![(ကောလင်းမြို့ ခရိုင်ထွေအုပ်ရုံးတွင် ပြည်သူ့တော်လှန်ရေးအလံလွှင်တင်ထားစဥ်/ စစ်ကောင်စီတပ်ထံမှ သိမ်းဆည်းရရှိသော လက်နက်ခဲယမ်းများ။ဓါတ်ပုံ-NUG-MOD)](https://i0.wp.com/www.ludunwayoo.com/wp-content/uploads/2023/11/398871843_674613084737487_2630674753148899543_n.jpg?resize=880%2C396&ssl=1)
“သူတို့ ဟိုပြေးရမလိုလို ဒီပြေးရမလိုလို ဖြစ်နေပြီ။ အခုက သူတို့ပြန် ပြေးရမယ့်အလှည့်ရောက်ပြီ။ လက်နက်ချအလင်းဝင်မယ်လို့လည်း ကြားနေရတယ်” ဟုဝန်းသိုမြို့ခံတစ်ဦးကပြောသည်။
ထီးချိုင်မြို့တွင်လည်း အထွေထွေအုပ်ချုပ်ရေးရုံးကို ယနေ့ နံနက်တွင် ပိတ်လိုက်ပြီး ဝန်ထမ်းများအားလုံးသည် စစ်တပ်တပ်စွဲထားသည့် မြသိန်းတန်တောင်ပေါ်သို့ သွားရောက်တိမ်းရှောင်နေကြကြောင်းဒေသခံအချို့ကပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
ပုလဲမြို့နယ်တွင် ကာလရှည်စစ်ကြောင်းထိုးနေသည့် စစ်ကောင်စီစစ်ကြောင်းသည် ယနေ့နံနက်တွင် နောက်ကြောင်းပြန်ခေါက်လာပြီး မုံရွာမြို့ရှိ အနောက်မြောက်တိုင်းစစ်ဌာနချုပ် (နမခ)သို့ ဦးတည်နေကြောင်း သိရသည်။
![(ကောလင်းမြို့ ခရိုင်ထွေအုပ်ရုံးတွင် ပြည်သူ့တော်လှန်ရေးအလံလွှင်တင်ထားစဥ်/ စစ်ကောင်စီတပ်ထံမှ သိမ်းဆည်းရရှိသော လက်နက်ခဲယမ်းများ။ဓါတ်ပုံ-NUG-MOD)](https://i0.wp.com/www.ludunwayoo.com/wp-content/uploads/2023/11/398876151_674613118070817_2749250703880924935_n.jpg?resize=486%2C1080&ssl=1)
” ဒီကောင်တွေလမ်းပျောက်နေပြီ။ သူတို့ ခံရတော့မှာသေချာတော့ကြောက်နေကြတာ”ဟု ယင်းမာပင်မြို့ခံတစ်ဦးကပြောသည်။
ကောလင်းမြို့မှရဲစခန်း၊ အထွေထွေ အုပ်ချုပ်ရေးရုံး၊ အထက်တန်းကျောင်း၊ မြေစာရင်းရုံး၊ မြန်မာ့စီးပွားရေးဘဏ်တို့တွင် တပ်စွဲထားသည့်စစ်ကောင်စီတပ်ဖွဲ့ဝင်များကို နိုဝင်ဘာလ ၃ရက်မှစတင်၍ တိုက်ခိုက်ခဲ့ပြီးယနေ့(နိုဝင်ဘာလ ၆ရက် )နံနက် အောင်မြင်စွာ တိုက်ခိုက်သိမ်းပိုက်နိုင်ခဲ့ပြီး လက်နက်ခဲယမ်းများစွာရရှိခဲ့ကြောင်းအမျိုးသား ညီညွတ်ရေးအစိုးရကာကွယ်ရေးဝန်ကြီးဌာနက ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)