ရှမ်းပြည်နယ်မြောက်ပိုင်း မူဆယ်မြို့အဝင် အေးရှားဝေါဂိတ်၌ မြောက်ပိုင်းမဟာမိတ်သုံးဖွဲ့နှင့် စစ်ကောင်စီတပ်တို့ ယနေ့ နံနက် ၆နာရီကစ၍ တိုက်ပွဲအပြင်းအထန်ဖြစ်ပွားနေကြောင်း သတင်းရရှိသည်။
” အေးရှားဝေါမှာ တမနက်လုံး ချနေကြတာ။ မူဆယ်အဝင်ပဲ။ တိုက်ပွဲတော်တော်လေး ပြင်းထန်နေတယ်”ဟု မူဆယ်မြို့ခံတစ်ဉီးက ပြောသည်။
တရုတ်နိုင်ငံနှင့် နယ်စပ်ကုန်သွယ်ရေးဂိတ်အနီး ကျင်စန်းကျော့ဂိတ်ကို တအာင်းအမျိုးသားလွတ်မြောက်ရေးတပ်မတော်(TNLA)က ယမန်နေ့တွင် သိမ်းပိုက်ပြီးနောက် မူဆယ်မြို့အနီးရှိ စစ်ရေးပစ်မှတ်များကို မြောက်ပိုင်းမဟာမိတ်သုံးဖွဲ့က ဆက်လက်တိုက်ခိုက်နေခြင်းဟု ဒေသခံများက ပြောသည်။
” ၁၀၅ကုန်သွယ်ရေးဇုံဘက်ကလည်း တိုက်ပွဲအသံတွေ ကြားနေရတယ်။ မြို့ပတ်ချာလည်နေရာတွေမှာ ဖြစ်နေတာပါ။ အေးရှားဝေါမှာတော့ အပြင်းထန်ဆုံးပဲ”ဟု ဒေသခံတစ်ဦးက ပြောသည်။
အေးရှားဝေါတိုးဂိတ်သည် ကွတ်ခိုင် – နမ့်ဖက်ကာ- မူဆယ် ပြည်ထောင်စုလမ်းမကြီးအတိုင်း မူဆယ်မြို့အဝင်၌ ရှိသည်။ မူဆယ်မြို့နယ်၊ စယ်လန့်ကျေးရွာတွင်လည်း နိုဝင်ဘာ ၂၄ ရက် နံနက်တွင် စစ်ကောင်စီက ပေါင် ၅၀၀ဗုံးကြဲချခဲ့သည်။
Public Service Announcement
မူဆယ်မြို့နယ် ပတ်ဝန်းကျင်၌ ယခုကဲ့သို့ စစ်ရေးတင်းမာနေစဉ် တရုတ်ကလည်း နိုဝင်ဘာ၂၅ ရက်မှစ၍ မြန်မာ-တရုတ် နယ်စပ် တရုတ်နိုင်ငံဘက်ခြမ်းတွင် စစ်ရေးလေ့ကျင့်နေသည်။
၁၀၂၇ စစ်ဆင်ရေးသည် ရပ်တန့်သွားခြင်းမရှိဘဲ ဟန်ချက်ညီစစ်ဆင်ရေးများကို တစ်ရက်ပြီး တစ်ရက် ဆင်နွှဲနေပြီး ရည်မှန်းထားသော စစ်ရေး၊ နိုင်ငံရေးရည်မှန်းချက်များကို ဆက်လက်အကောင်အထည်ဖော်ရန်အတွက် မိမိတို့အနေဖြင့်လည်း စစ်ရေးအရှိန်ကို ထပ်မံမြှင့်တင်သွားမည်ဟု ညီနောင်မဟာမိတ်သုံးဖွဲ့က ယမန်နေ့တွင် ထုတ်ပြန်ထားသည်။
