ထိုင်းနိုင်ငံမှာ ရထားတစီး လမ်းချော်မှု ဖြစ်ပွားပြီး ခရီးသည်တချို့ ထိခိုက်ဒဏ်ရာ ရရှိခဲ့ကြောင်း သိရပါတယ်။
စက်တင်ဘာ ၃၀ မနက်ပိုင်းက အထူးအမြန်ရထား အမှတ် ၁၃ ဟာ ဘန်ကောက်ကနေ ချင်းမိုင်ကို ဦးတည် ခုတ်မောင်းရင်း ဖရေးဒေသက တောအုပ် တနေရာကို ဖြတ်သန်းတုန်း လမ်းချော်ခဲ့တာလို့ အာဏာပိုင်တွေက ပြောပါတယ်။
ရထားခေါင်းတွဲ၊ ကုန်တင်တွဲနဲ့ အိမ်ဆောင်တွဲ စုစုပေါင်း ရထားတွဲ ၃ ခု လမ်းချော် တိမ်းမှောက်ခဲ့ပြီး ကံကောင်းထောက်မစွာနဲ့ အနည်းအကျဉ်း ဒဏ်ရာရသူ တချို့သာ ရှိခဲ့ပါတယ်။ အခင်းဖြစ်တဲ့ နေရာကို ရောက်သွားတဲ့ ကယ်ဆယ်ရေး အဖွဲ့တွေက အသေအပျောက် မရှိဘူးလို့ အတည်ပြုခဲ့ပါတယ်။
မိုးရွာသွန်းမှုတွေကြောင့် တောထဲကနေ ရေတွေလျှံကျပြီး ရထားလမ်းပေါ် ဖြတ်သန်း စီးဆင်းရာကနေ အခုလို မတော်တဆမှု ဖြစ်ခဲ့တာလို့ ကနဦး စုံစမ်းမှုတွေအရ သိရပါတယ်။
ခရီးသည်တွေကို တခြားရထားတစ်ခုဆီ ရွှေ့ပြောင်းပေးပြီး ချင်းမိုင်ကို ခရီးဆက်စေခဲ့ပါတယ်။ ရထားလမ်းချော်မှု ဖြစ်ခဲ့တဲ့ လမ်းပိုင်းကို ယာယီ ပိတ်ထားပြီး တိမ်းမှောက်နေတဲ့ ရထားတွဲတွေကို ပြန်လည် ဆွဲယူဖို့ ဆက်လက် ဆောင်ရွက်နေကြောင်း တာဝန်ရှိသူတွေက ပြောပါတယ်။
Public Service Announcement
