စစ်ကိုင်းတိုင်း၊ ချောင်းဦးမြို့နယ်တွင် ရဲဘော်နှင့်ပြည်သူများအား သတ်ဖြတ်ခဲ့သည့် စစ်ကောင်စီစစ်ကြောင်းအား မိုင်းနှစ်ကြိမ်ဆွဲတိုက်ခိုက်ခဲ့ကြောင်း လျှပ်စီးတပ်ခွဲ – မုံရွာခရိုင်က သတင်းထုတ်ပြန်သည်။
စက်တင်ဘာ ၂၈ ရက် နံနက် ၇ နာရီခန့်က ချောင်းဦးမြို့နယ်တွင် အင်အား ၇၀ ကျော်ပါ စစ်ကောင်စီစစ်ကြောင်းသည် ဆင်ဖြူရှင်တံတားဘက်သို့ ထွက်လာစဉ် ပေါက်အင်းကျေးရွာအနီးအရောက်တွင် နှစ်ကြိမ်တိုက်ခိုက်ခဲ့ကြောင်း လျှပ်စီးတပ်ခွဲ – မုံရွာခရိုင် အမှတ်-၁၂ တပ်ရင်း ၊ တပ်ခွဲ-၃၏ တပ်ခွဲမှူး မိုးကြိုးက ပြောသည်။
“ပွိုင့်တစ်ခုနဲ့ တစ်ခုက နီးတယ်။ ကိုက် ၅၀၀ လောက်ပဲ ဝေးမယ်ဗျ။ ပထမပွိုင့် ခွဲတဲ့နေရာမှာ မိုင်းထိတဲ့သူတွေကို ဒဏ်ရာသန့်ရှင်းရေးလုပ်ထားတာတွေနဲ့ သွေးကွက်တွေကို သူတို့ ရေနဲ့ ပြန်ဆေးထားတာတွေ တွေ့ရတယ်။ ဒုတိယပွိုင့် ခွဲတဲ့နေရာမှာတော့ သူတို့ယူနီဖောင်းတွေပါ ချွတ်ထားတာတွေ့ရတယ်။ သွေးကွက်တွေလည်း တွေ့ရတယ်။ နှစ်ပွိုင့်စလုံးခွဲပြီး နာရီဝက်လောက်ကြာတော့ ဖောကားနဲ့ လာသယ်သွားတာကိုလည်း မျက်မြင် ပြည်သူတွေကတဆင့် အတည်ပြုနိုင်ခဲ့တယ်။”ဟု တပ်ခွဲမှူး မိုးကြိုးက ပြောသည်။
စစ်ကောင်စီတပ်သားများကလည်း (၄၀) မမ လက်နက်ကြီးနှင့် လက်နက်ငယ်များဖြင့် ၁၅မိနစ်ခန့်ကြာအောင် ပြန်လည်ပစ်ခတ်ခဲ့ကြောင်း၊ ထို့နောက် ထိခိုက်သွားသည့် စစ်ကောင်စီတပ်သားများအား လာရောက်ခေါ်ဆောင်သွားကြောင်း တပ်ခွဲမှူး မိုးကြိုးက ဆိုသည်။
အဆိုပါ စစ်ကြောင်းသည် ပြီးခဲ့သည့် စက်တင်ဘာ ၂၆ ရက်က ချောင်းဦးမြို့နယ်အတွင်း ရဲဘော် သုံးဦးနှင့် ဒေသခံ ပြည်သူ ၆ဦး သတ်ဖြတ်ခဲ့သည့် စစ်ကောင်စီတပ်ဖြစ်ကြောင်း ဒေသခံများက ပြောသည်။
Public Service Announcement
ယင်းတိုက်ခိုက်မှုအား လျှပ်စီးတပ်ခွဲ (မုံရွာခရိုင် အမှတ်-၁၂ တပ်ရင်း၊ တပ်ခွဲ-၃ ) နှင့် ရန်ရှင်းဒေသခံ ပြည်သူ့ကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
စက်တင်ဘာ ၂၆ ရက်ကလည်း ချောင်းဦးမြို့နယ်လမ်းပိုင်းတွင် ကင်းစောင့်နေသော ပြည်သူ့ကာကွယ်ရေးရဲဘော်နှစ်ဦးအား စစ်ကောင်စီတပ်က သတ်ဖြတ်သွားခဲ့သေးသည်။
