ယူကရိန်းမှာ နာရေးတခု ပြုလုပ်နေတဲ့ ရုရှားက ဒုံးကျည်နဲ့ တိုက်ခိုက်ခဲ့တာကြောင့် ၈ နှစ်သား ကလေးငယ် အပါအဝင် လူ ၅၀ ကျော် သေဆုံးခဲ့ကြောင်း သိရပါတယ်။
အောက်တိုဘာ ၅ ရက်က ခါကစ်ဗ်ပြည်နယ် အရှေ့တောင်ပိုင်းမှာရှိတဲ့ ဟာရိုဇာ ကျေးရွာမှာ နာရေးအတွက် လူစုလူဝေး ဖြစ်နေချိန်မှာ ရုရှားက ဒုံးကျည်နဲ့ တိုက်ခိုက်ခဲ့တာလို့ ယူကရိန်း အာဏာပိုင်တွေက ပြောပါတယ်။
စစ်ရေးပစ်မှတ် လုံးဝမရှိဘဲ အရပ်သားတွေချည်း စုဝေးနေတဲ့ နေရာ တိုက်ခိုက် ခံရတဲ့နောက် လူ ၅၁ ဦးထက်မနည်း သေဆုံးပြီး ၈ နှစ်အရွယ် ကလေးငယ် တစ်ဦးလည်း ပါဝင်ခဲ့ကြောင်း ယူကရိန်း ကာကွယ်ရေး ဝန်ကြီးဌာန ထုတ်ပြန်ချက်မှာ ဖော်ပြထားပါတယ်။
ခါကစ်ဗ်ပြည်နယ် အုပ်ချုပ်ရေးမှူး အိုလာ ဆင်ယီဟူဘော့ဗ်က ဒီတိုက်ခိုက်မှုဟာ သူ့ဒေသထဲမှာ ကြုံဖူးသမျှ သွေးအလွှမ်းဆုံး ဖြစ်ရပ်ဆိုး တခုအဖြစ် မှတ်ချက် ပေးခဲ့ပါတယ်။ အကြမ်းဖက် တိုက်ခိုက်မှု ဖြစ်စဉ် တစ်ခုတည်းကြောင့် ကျေးရွာလူဦးရေ ငါးပုံတစ်ပုံလောက် သေဆုံးကုန်ကြတယ်လို့ ဆင်ယီဟူဘော့ဗ်က ဆိုပါတယ်။
ရုရှားရဲ့ စာနာမှု ကင်းမဲ့တဲ့ တိုက်ခိုက်မှုကြောင့် ဟာရိုဇာ ကျေးရွာထဲက မိသားစုတိုင်း တအိမ်မကျန် ထိခိုက် ခံစားခဲ့ကြရတယ်လို့လည်း ပြည်ထဲရေးဝန်ကြီး အိုင်ဟော် ကလိုင်မန်ကိုက ပြောကြားခဲ့ပါတယ်။
Public Service Announcement
ယူကရိန်း သမ္မတ ဗိုလိုဒီမာ ဇီလန်စကီးကလည်း အခုလုပ်ရပ်မျိုးကို တိရစ္ဆာန် အရိုင်းအစိုင်းတွေနဲ့ ခိုင်းနှိုင်းရင်တောင် တိရစ္ဆာန်တွေ သိက္ခာကျလိမ့်မယ်လို့ ဝေဖန်သွားခဲ့ပါတယ်။ နာရေးကိစ္စ ရွာသူရွာသားတွေချည်း စုဝေးနေချိန်မှာ ရုရှားက ရည်ရွယ်ချက်ရှိရှိ ဒုံးကျည်နဲ့ ပစ်ခတ်ခဲ့တာလို့လည်း ဇီလန်စကီးက စွပ်စွဲခဲ့ပါတယ်။
ပြည်ထဲရေး ဝန်ကြီးဌာန ထုတ်ပြန်ချက်မှာ ရုရှားက Iskander ဒုံးကျည်တစ်စင်း အသုံးပြုပြီး ဟာရိုဇာ ကျေးရွာကို ပစ်ခတ်ခဲ့တာလို့ ဖော်ပြထားပေမယ့် သီးခြား အတည်မပြုနိုင်ပါဘူး။
ယူကရိန်းဖက်က စွပ်စွဲမှုတွေနဲ့ ပတ်သက်ပြီး ရုရှားက လောလောလတ်လတ် ဘာမှတ်ချက်မှ မပေးသေးပါဘူး။ ရုရှားဟာ အရင်ကလည်း ယူကရိန်းမှာ အရပ်ဖက် ပစ်မှတ်တွေကို အကြိမ်ကြိမ် တိုက်ခိုက်ခဲ့ဖူးပေမယ့် ပြောင်ပြောင်တင်းတင်း ငြင်းဆိုပြီး စစ်ရေး ပစ်မှတ်တွေကို ဦးတည်ခဲ့တာသာ ဖြစ်တယ်လို့ ကာကွယ် ပြောဆိုခဲ့ပါတယ်။
