မန္တလေး၊ ပုသိမ်ကြီးမြို့နယ်တွင် ယနေ့ (ဧပြီ ၂၀) နံနက်က ဈေးဝယ်ပြန်လာသော စစ်သားများ ပစ်ခတ်ခံရပြီး ၁ ဦး သေဆုံး၊ ၂ ဦး ဒဏ်ရာရရှိခဲ့ကြောင်း မြို့ခံများထံမှ သိရသည်။
နံနက် ၇ နာရီခန့်တွင် မော်တော်ယာဉ်ပေါ်မှ သေနတ်သမားများက မန္တလေး-မတ္တရာ ကားလမ်းပေါ်ရှိ မြကန်သာကျေးရွာဈေးသို့ လာသော ထိုစစ်သား ၃ ဦးကို ပစ်ခတ်သွားခြင်းဖြစ်ကြောင်း ထိုမြို့နယ်တွင် နေထိုင်သူ အသက် ၃၀ အရွယ် အမျိုးသမီးတစ်ဦးက ပြောသည်။
“Light Truck တစ်စီးပေါ်ကနေ ပစ်သွားတာ။ ၁၀ ချက်လောက် ရှိတယ်။ ပစ်သံတွေလည်း ဈေးအနီးတစ်ဝိုက် ဆူညံနေတာပဲ” ဟု သူက ဆိုသည်။
ပစ်ခတ်ခံရသူတို့သည် မြကန်သာကျေးရွာအုပ်ချုပ်ရေးမှူးရုံးတွင် အစောင့်ကျနေသည့် စစ်သားများဖြစ်ပြီး ပွဲချင်းပြီးသေဆုံးသူမှာ ဗိုက်နှင့် ဦးခေါင်းတွင် ကျည်ထိမှန်ခဲ့ကြောင်း၊ နောက်နှစ်ဦးမှာလည်း ဒဏ်ရာပြင်းထန်ကြောင်း သူက ဆက်ပြောသည်။
“နတ်ဆိုး (မြေအောက်တော်လှန်ရေးတပ်ဖွဲ့)” ဟု အမည်ပေးထားသောအဖွဲ့က ထိုတိုက်ခိုက်မှုနှင့် ပတ်သက်ပြီး ၄၆ စက္ကန့်ကြာမြင့်သည့် ရုပ်သံမှတ်တမ်းကို အွန်လိုင်းသတင်းဌာများထံ ပေးပို့ခဲ့သည်။ ကားပေါ်မှ ပစ်ခတ်နေသည့် သေနတ်သမားတို့ သင်္ကန်းဝတ်ထားသည်ကို ရုပ်သံတွင် တွေ့ရသည်။
သေနတ်သမားတို့ မည်သူမည်ဝါဖြစ်သည်ကို မသိရသေးပေ။
အလားတူ စစ်ကောင်စီဝါဒဖြန့်ချန်နယ်များတွင်လည်း ပွဲချင်းပြီးသေဆုံးနေသော စစ်သားတစ်ဦးနှင့် ဒဏ်ရာရနေသော စစ်သားတစ်ဦးပုံကို ထုတ်ပြန်ထားပြီး သင်္ကန်းဝတ်ထားသည့် ၈ ဦးက Light Truck ကားတစ်စီးဖြင့် ရောက်လာကာ ပစ်ခတ်သွားခြင်းဖြစ်ကြောင်း၊ အနီး၌ AK-47 ကျည် ၂ တောင့်၊ ကျည်ခွံ ၅ ခုတို့ကို တွေ့ရကြောင်း ရေးသားဖော်ပြနေကြသည်။
အဆိုပါကားသည် မြကန်သာရွာလမ်းအတိုင်း မောင်းနှင်သွားပြီး ရွာထိပ်တံတားအနီး သင်္ကန်း၂ ထည် ကျကျန်ရစ်ခဲ့ကြောင်း၊ ဖမ်းဆီးရမိရေး ပိတ်ဆို့ဆောင်ရွက်နေကြောင်း ရေးသားထားကြသည်။
လက်ရှိတွင် စစ်ကောင်စီတပ်သားများသည် ပုသိမ်ကြီးမြို့နယ်နှင့် မတ္တရာမြို့နယ်အစပ်လမ်းများ၌ ပိတ်ဆို့ရှာဖွေနေပြီး ကားများကို ပစ်မှတ်ထား စစ်ဆေးရှာဖွေနေသည်ဟု သိရသည်။
ပုသိမ်ကြီးတွင် စျေးဝယ်ထွက်သော စစ်သား ၃ ဦးကို တိုက်ခိုက်မှုရုပ်သံမှတ်တမ်းကို ဖြန့်ခဲ့သည့်အဖွဲ့သည် အခြားမဟာမိတ်အဖွဲ့ ၃ ဖွဲ့နှင့် ပူးပေါင်းကာ ဧပြီ ၇ ရက်နေ့တွင် မန္တလေးတိုင်း၊ မတ္တရာမြို့နယ်အရှေ့ခြမ်း ကျောက်ဆည်လေးကျေးရွာဘုန်းကြီးကျောင်းဝင်းအတွင်း တပ်စွဲထားသော စစ်ကောင်စီတပ်ကို ဒရုန်း ၄ စင်းဖြင့် ဗုံးသီးချ သွားရောက်တိုက်ခိုက်ခဲ့သည့် ရုပ်သံမှတ်တမ်းဖိုင်ကိုလည်း မကြာသေးမီက ထုတ်ပြန်ထားသည်။
ပြီးခဲ့သည့် ဧပြီ ၆ ရက်နေ့ကလည်း ပုသိမ်ကြီးမြို့နယ်၊ အောင်ချမ်းသာကျေးရွာတွင် လျှပ်စစ်ဓါတ်အားခွဲရုံ အစောင့်ကျနေသည့် ရဲတပ်ကြပ်တစ်ဦး ကွမ်းယာဝယ်ထွက်စဉ် ပစ်သတ်ခံရသည်။
ယမန်နှစ် နှစ်လယ်က မြို့ပြပြောက်ကျား ၄၀ ထက်မနည်း ဖမ်းဆီးခံထားရသော မန္တလေးမြို့တွင် ပြောက်ကျားတိုက်ခိုက်မှုများ အရှိန်လျော့ကျမသွားဘဲ ဆက်ရှိနေရာ စစ်ကောင်စီလက်အောက်ခံ ရဲ၊ စစ်သား၊ အုပ်ချုပ်ရေးဝန်ထမ်းများ ဆက်တိုက်ဆိုသလို တိုက်ခိုက်ခံနေရသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
