အာဏာသိမ်းစစ်တပ်က တန်ပြန်ထိုးစစ်ဆင်နေတဲ့ ကရင်နီ(ကယား)ပြည်နယ်မှာ ဒီးမော့ဆို၊ ဘောလခဲမြို့နယ်တွေအပြင် ရှမ်း-ကရင်နီအစပ်က မိုးဗြဲနဲ့ဖယ်ခုံမြို့နယ်တွေမှာလည်း နှစ်ဖက်တိုက်ပွဲပြင်းထန်နေပါတယ်။
အာဏာသိမ်းစစ်ဗိုလ်ချုပ်တွေရဲ့ ဌာနချုပ် နေပြည်တော်နဲ့ မိုင် ၁၀၀ကျော်သာဝေးတဲ့ ကရင်နီဒေသဟာ စစ်ရေးအရ အရေးပါပါတယ်။ တစ်ဖက်မှာလည်း နှစ်ကုန်ပိုင်းကျင်းပမယ့် ရွေးကောက်ပွဲနီးကပ်လာချိန်မှာ ကရင်နီတော်လှန်ရေးပူးပေါင်းတပ်တွေ သိမ်းပိုက်ထားတဲ့ နယ်မြေတွေကို ပြန်ထိန်းချုပ်ဖို့ စစ်တပ်က အလုံးအရင်းနဲ့ ထိုးစစ်ဆင်နေတာပါ။
ကရင်နီဒေသထိုးစစ်ကို ‘ရန်နိုင်မင်း’ စစ်ဆင်ရေးလို့ နာမည်ပေးထားပြီး စစ်တပ်နဲ့အတူ ပအိုဝ်းပြည်သူ့စစ်တွေ ပူးတွဲလှုပ်ရှားနေကြတယ်လို့ သိရပါတယ်။
လက်ရှိမှာ ဒီးမော့ဆို မြိုအနီးတဝိုက်နဲ့ ဒီးမော့ဆို-ဖရူဆို-ဘော်လခဲကားလမ်းတလျှောက် တိုက်ပွဲတွေ ပြင်းထန်နေတယ်လို့ ကရင်နီအမျိုးသားများကာကွယ်ရေးတပ်ဆီက သိရပါတယ်။
ဒီးမော့ဆိုမြို့ကို ဗဟိုပြုပြီး စစ်ရေးလှုပ်ရှားနေတဲ့ စစ်တပ်နဲ့ တော်လှန်ရေးတပ်ဖွဲ့တွေဟာ ဒီးမော့ဆိုမြို့အနီးက ဒေါငံခါးရပ်ကွက်မှာလည်း တိုက်ပွဲတွေပြင်းထန်နေပါတယ်။
ဒါ့အပြင် ရှမ်း-ကရင်နီအစပ် ဖယ်ခုံမြို့နယ်က တောင်စလုံးရွာဘက်ကိုလည်း စစ်တပ်နဲ့ ပအိုဝ်းပြည်သူ့စစ်တွေ ပူးပေါင်းပြီး စစ်ရေးလှုပ်ရှားလာတာကြောင့် တိုက်ပွဲတွေဖြစ်နေတယ်လို့ ကရင်နီအမျိုးသားများကာကွယ်ရေးတပ်(KNDF) ပြန်ကြားရေးတာဝန်ရှိသူ တာအယ်စိုးက ပြောပါတယ်။
မြတ်ကြီး/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
