တနှစ်ကျော်ကြာ တိုက်ပွဲအပြင်းအထန်ဖြစ်နေတဲ့ ဗန်းမော်စစ်မျက်နှာအပါအဝင် မြန်မာပြည်မြောက်ဖျားပိုင်း ကချင်ပြည်နယ်က ကျောက်စိမ်းမြေ ဖားကန့် နဲ့ ဝိုင်းမော်မြို့နယ်တွေမှာ အာဏာသိမ်းစစ်တပ်နဲ့ တိုက်ပွဲတွေ ပြင်းထန်နေဆဲလို့ ကချင်လွတ်လပ်ရေးတပ်မတော် (KIA)ဆီက သိရပါတယ်။
ဗန်းမော်မြို့သိမ်းတိုက်ပွဲဟာ နိုင်ငံရေးဂုဏ်သိက္ခာတိုက်ပွဲဖြစ်ပြီး အရင်းအနှီးကြီးမှာသိပေမယ့် နိုင်အောင်တိုက်မယ်လို့ KIA ဒုတိယဗိုလ်ချုပ်ကြီး ဂွန်မော်က ၆၅နှစ်မြောက် ကချင်တော်လှန်ရေးနေ့ အခမ်းအနား မိန့်ခွန်းမှာ ပြောဆိုထားပါတယ်။
၂၀၂၄ ခုနှစ် မတ်လဆန်းက စခဲ့တဲ့ ကချင်ပြည်နယ် ထိုးစစ်အတွင်း အာဏာသိမ်းစစ်တပ်ရဲ့ ရာနဲ့ချီတဲ့ တပ်စခန်းတွေနဲ့ မြို့ပေါင်း ၁၅ မြို့ ၊ ရှမ်းမြောက်က မဘိမ်းမြို့၊ ကွတ်ခိုင်မြို့နယ် နဲ့ နမ့်ဖတ်ကာရွာကြီးတို့ ကို KIA က သိမ်းပိုက်နိုင်ခဲ့ပါတယ်။KIA သိမ်းပိုက်ခဲ့တဲ့ မြို့တွေထဲမှာ တရုတ် နယ်စပ်ကုန်သွယ်ရေးမြို့တွေဖြစ်တဲ့ ပန်ဝါ၊ကန်ပိုက်တီ၊လွယ်ဂျယ်မြို့တွေလဲ ပါဝင်ပါတယ်။
သတင်း/တင်ဆက်-မြတ်ကြီး
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
