ရုရှားအစိုးရဟာ ယူကရိန်းနဲ့ အပစ်အခတ်ရပ်စဲရေးဆွေးနွေးဖို့အတွက် လပေါင်းများစွာ ငြင်းဆန် ခဲ့ပေမယ့် အခုအခါမှာတော့ ငြိမ်းချမ်းရေးဆွေးနွေးပွဲတွေ ပြန်စဖို့ မျှော်လင့်ကြောင်း ရုရှားအစိုးရပြောရေးဆိုခွင့်ရှိသူ ဒီမစ်ထရီ ပက်စကော့ဗ်က မေလ ၁၈ ရက်နေ့မှာ တောင်းဆိုလိုက်ပါတယ်။
ယူကရိန်းစစ်တပ်က စစ်မြေပြင်မှာရော ရုရှားနိုင်ငံအတွင်းပိုင်းအထိ အဝေးပစ် ဒရုန်းတွေနဲ့ တိုက်ခိုက်တဲ့နေရာမှာပါ ပြင်းပြင်းထန်ထန် လုပ်လာနိုင်တဲ့အချိန်မှာ ရုရှားဘက်က အခုလို လေသံပြောင်းလာတာ ဖြစ်ပါတယ်။
ပြီးခဲ့တဲ့ သီတင်းပတ်အတွင်းမှာ ရုရှားနိုင်ငံတွင်းနဲ့ ရုရှား သိမ်းပိုက်ထားတဲ့ နယ်မြေတွေအတွင်းကို ယူကရိန်းက ဒရုန်းအစင်းရေ စုစုပေါင်း ၃,၁၂၄ စင်းနဲ့ ပစ်ခတ်ခဲ့တယ်လို့ ရုရှားကာကွယ်ရေးဝန်ကြီးဌာနက ထုတ်ပြန်ခဲ့ပါတယ်။
ရုရှားက ယူကရိန်းနိုင်ငံထဲကို ပြီးခဲ့တဲ့ သီတင်းပတ်အတွင်းက ၃ ရက်ဆက်တိုက် ဒရုန်းတွေနဲ့ တိုက်ခိုက်မှုအပေါ် ယူကရိန်းကလည်း ရုရှားမြို့တော် မော်စကိုအပါအဝင် ရုရှားဒေသတွေကို မေလ ၁၇ နဲ့ ၁၈ ရက်တွေမှာ ဒရုန်း အစင်းရေ ၆၀၀ နီးပါးနဲ့ လက်တုံ့ပြန် တိုက်ခိုက်ခဲ့ပါတယ်။
ရုရှားကာကွယ်ရေးဝန်ကြီးဌာနရဲ့ မေလ ၁၇ ရက်နေ့ ထုတ်ပြန်ချက်မှာလည်း ယူကရိန်းဟာ ရုရှားဒေသ ၁၄ ခုအပြင် ခရိုင်းမီးယားကျွန်းဆွယ်၊ ပင်လယ်နက်နှင့် အာဇော့ဗ်ပင်လယ်တို့ကို တိုက်ခိုက်ခဲ့သလို မြို့တော်မော်စကို ပတ်ဝန်းကျင်ဒေသမှာလည်း ဆိုးဆိုးရွားရွား ထိမှန်ခဲ့တယ်လို့ ဖော်ပြခဲ့ပါတယ်။
အမေရိကန်သမ္မတ ဒေါ်နယ်ထရမ့်ကတော့ “အခုလို နှစ်ဖက် အပြန်အလှန် တိုက်ခိုက်မှုတွေကြောင့် အရပ်ဘက်ပစ်မှတ်တွေကို ထိခိုက်နေတာဟာ လေးနှစ်ကြာ စစ်ပွဲကို ငြိမ်းချမ်းရေးယူဖို့ ကြိုးပမ်းမှုတွေ နှောင့်နှေးသွားစေတယ်” လို့ ပြီးခဲ့တဲ့ သီတင်းပတ်တုန်းက သတင်းထောက်တွေကို ပြောအပြီးမှာ ရုရှားဘက်က အခုလို ကမ်းလှမ်းမှုတွေ ထွက်ပေါ်လာတာဖြစ်ပါတယ်။
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် /qurium/myanmar-now.org/mm-members.html တွင် ကူညီနိုင်ပါသည်။
