اطلاعات روز: د امریکا د بهرنیو چارو وزارت ویاند ټامي بروس ویلي، چې له افغانستان او یمن سره د خوړو نړیوال پروګرام له لارې د امریکا مالي مرستې د طالبانو او حوثیانو د لاسرسي د اندېښنو له امله درول شوي دي.
هغه د سې شنبې په ورځ په یوې خبري ناسته کې ویلي، چې د امریکا د نړیوالې پرمختیایي ادارې د پخوانیو پروګرامونو ۸۵ سلنه د خوړو نړیوال پروګرام سره په ټوله نړۍ کې فعال دي او دوام لري.
خو، د هغه په وینا په ځینو هیوادونو کې د ځانګړو لومړیتوبونو پر بنسټ د خوړو نړیوال پروګرام محدود شمیر پروګرامونه ځنډول شوي دي.
نوموړي زیاته کړې: «هغه څه چې موږ دلته لرو هغه دا دي چې په یمن او افغانستان کې د نړیوال خوراکي پروګرام تر ټولو ستره مرستندویه ډله د یوه اجرائیوي فرمان له مخې پای ته رسېدلې ده. د دې اندېښنې له مخې چې دا مالي مرسته د ترهګریزو ډلو، لکه حوثیانو او طالبانو، په ګټه تمامېدله.»
د امریکا د بهرنیو چارو وزارت ویاند ټینګار کړی چې د نړیوال خوراکي پروګرام له لارې د یمن شمال ته ټولې خوراکي مرستې د حوثیانو د هر ډول لاسوهنې د کمولو لپاره ځنډول شوې دي.
د طالبانو د لاسوهنې د کمولو لپاره په ټول افغانستان کې د خوراکي توکو مرسته هم په وقفه يي ډول ځنډول شوې ده.
په ورته وخت کې، رویټرز خبري اژانس د شپږو باخبره سرچینو په حواله راپور ورکړی، چې د امریکا د ولسمشر ډونالډ ټرمپ ادارې د سې شنبې په ورځ لږ تر لږه شپږ د امریکا د بهرنیو مرستو پروګرامونه چې په دې وروستیو کې لغوه شوي وو، بیرته پیل کړي دي.
د دې راپور له مخې، د امریکا د نړیوالې پراختیایي ادارې مرستیال مدیر جرمي لوین، چې مخکې د ټرمپ ادارې د اغیزمنتوب دفتر د غړي په توګه پیژندل شوی و، د ادارې له کارمندانو څخه په یوه داخلي بریښنالیک کې غوښتي چې د مرستې ځینې پروګرامونه بیرته پیل کړي.
پنځو باخبره سرچینو ویلي، چې هغه په لبنان، سوریه، سومالیا، اردن، عراق او ایکواډور کې د نړیوال خوراکي پروګرام سره د مرستو د بیا پیل غوښتنه کړې ده.
له موضوع باخبره سرچینو زیاته کړې، چې د ټرمپ ادارې د آرام سمندر په سیمه کې د کډوالۍ نړیوال سازمان لپاره څلور د مرستې پروګرامونه هم بیا پیل کړي دي.
د خوړو نړیوال پروګرام د دوشنبې په ورځ اعلان وکړ چې متحده ایالاتو دې سازمان ته خبر ورکړی چې په ۱۴ هیوادونو کې د خوړو بیړنۍ مرستې ختمې کړي.
د خوړو نړیوال پروګرام ویلي، چې دا د هغو میلیونونو خلکو لپاره د مرګ د حکم معنا لري چې له سختې لوږې سره مخ دي.
رویټرز لیکلي، چې متحده ایالاتو د طالبانو تر واکمنۍ لاندې افغانستان او یمن ته خپلې مرستې نه دي ترمیم کړي.
واشنګټن د دواړو هېوادونو لپاره، چې د کلونو ویجاړونکې جګړې ځپلي دي، ترټولو لوی مرستندویه هیواد دی.