نورستان کې د طالبانو ځایي مسوولین خبر ورکوي چې د دې ولایت په واما ولسوالۍ کې د سیند په اوبو کې د یوه «ډاتسن» موټر د چپه کېدو له امله یو تن مړ او شپږ نور ټپیان شوي.
د نورستان د امنیې قومندانۍ لپاره د طالبانو ویاند احمد بشیر برکزاده وایي چې دا پېښه نن (پنجشنبه، ۲۰ د لیندۍ) ماښام مهال د دغه ولایت د واما ولسوالۍ د «کور درې» په «مڼهګل» سیمه کې را منځته شوې.
نوموړي ویلي چې په مړو شویو کې یوه ماشومه او همدا راز په ټپیانو کې درې مېرمنې شاملې دي چې د درملنې په موخه د واما ولسوالۍ روغتون ته لېږدول شوي.
برکزاده زیاتوي چې پېښه په موټر کې د تخنیکي ستونزې له امله را منځته شوې.
نورستان کې د خرابو او کوچنیو سړکونو له امله ډېری مهال مرګونې ترافیکي پېښې را منځته کېږي چې خلک په دې برخه کې پخواني او اوسني حکومتونه ګرم یادوي.
