په هرات کې د طالبانو د امنیه قوماندانۍ ویاند سید مسعود حسینی وايي، په عام محضر کې د یوه ځوان د وژنې مشکوک کسان پېژندل شوي او نیول شوي دي.
حسیني د دوشنبې په شپه (۱۶ وږي) په یوه ویډیويي پیغام کې ویلي چې د دغو کسانو دوسیه به عدلي او قضايي ادارو ته واستول شي.
د هرات د طالبانو د امنیه قوماندانۍ ویاند د نیول شویو کسانو د شمېر او هویت په اړه جزییات نه دي ورکړي.
۳۰ کلن عبدالقدیر پهلوانزاده چې په هرات ښار کې په ویلډینګ بوخت و، د جمعې په ورځ (۱۳ د وږي) شاوخوا ۵:۰۰ بجې د هرات ښار د څلورمې امنیتي حوزې اړوند د «پوسته نمبر یک» په سیمه کې د نبیزاده په تېلو ټانک کې په عام محضر کې په ډزو ووژل شو.
د دغه ځوان د وژنې ویډیو چې د تېلو ټانک د امنیتي کمرې له لارې ثبت شوې، په ټولنیزو رسنیو کې خپره شوې ده. په ویډیو کې لیدل کېږي چې څو وسلهوال کسان لومړی د دغه ځوان لاسونه تړي او تر وهلو وروسته یې په ډزو وژني.
د دغه ځوان پلار د خپل زوی له وژل کېدو درې ورځې وروسته په یوه ویډیويي پیغام کې د پېښې په اړه ځینې نوي جزییات وړاندې کړي او د موضوع د څېړنې غوښتنه یې کړې ده.
د عبدالقدیر پلار رستم پهلوانزاده وايي، هغه کسان چې د ده د زوی لاسونه یې تړلي او وروسته یې وژلی، د هرات د پښتونزرغون ولسوالۍ د طالبانو د امنیه قوماندان سید احمد محمدي، د هغه ورور او د مولوي حامد په نوم یو کس دي.
رستم پهلوانزاده ادعا کوي چې زوی یې د مولوي حامد له لوري وژل شوی دی.
د هغه په وینا، مولوي حامد ادعا کوي چې پلار یې د عبدالقدیر پهلوانزاده له لوري وژل شوی و. خو رستم پهلوانزاده وايي چې زوی یې بېګناه و او د مولوي حامد پلار څه باندې یو کال وړاندې د «ناڅرګندو کسانو» له لوري وژل شوی و.
رستم زیاتوي چې د مولوي حامد له لوري پر عبدالقدیر لګېدلي تورونه حقیقت نه لري او د هغه پر وړاندې په عدلي او قضايي ادارو کې هېڅ دوسیه نه وه ثبت شوې.
د هرات د طالبانو د امنیه قوماندانۍ ویاند سید مسعود حسینی ویلي چې دا موضوع به وڅېړل شي.
په رڼا ورځ او عام محضر کې د دغه ځوان د وژنې د ویډیو خپرېدو، په ځانګړي ډول وروسته له هغې چې په پېښه کې د یوه طالب قوماندان د حضور راپورونه خپاره شول، پراخ غبرګونونه راپارولي دي.
