د ملګرو ملتونو د نفوس صندوق (UNFPA) او د جاپان د نړیوالې همکارۍ ادارې (جایکا) چارواکو په افغانستان کې د قابلګۍ خدمتونو د پیاوړتیا او په ټول هېواد کې د میندو د روغتیا او تولیدمثل اړوند روغتیايي اړتیاوو ته د رسېدنې په اړه خبرې کړې دي.
افغانستان په داسې حال کې د میندو د مړینې له تر ټولو لوړو کچو سره مخ دی چې د ښځینه ډاکټرانو له کمښت سره هم مخامخ دی. اوس مهال په ځینو سیمو کې هېڅ ښځینه ډاکټره شتون نه لري. له بلې خوا، طالبانو د نجونو پر زدهکړو، د روغتیايي برخو په ګډون، بندیز لګولی دی.
د ملګرو ملتونو او جایکا چارواکو ویلي چې دواړه لوري په ګډه ژمن دي چې د افغانستان د ښځو، نجونو او کورنیو لپاره د باکیفیته روغتیايي خدمتونو د وړاندې کولو او د روغتیايي پایلو د ښه والي ملاتړ وکړي.
د ملګرو ملتونو د اټکل له مخې، په افغانستان کې په ۲۰۲۴ کال کې د هرو ۱۰۰ زرو ژوندیو زېږونونو پر وړاندې د میندو د مړینې کچه ۶۳۸ مړینې وه. دا په اسیا کې تر ټولو لوړه او په ټوله نړۍ کې اوومه لوړه کچه بلل شوې ده.
د نجونو پر زدهکړو د بندیزونو له دوام او د ښځینه ډاکټرانو، نرسانو او قابلو د کمښت له امله، ښايي په افغانستان کې د میندو د مړینې کچه لا لوړه شي.
دا په داسې حال کې ده چې طالبانو په ځینو سیمو کې د ښځینه ناروغانو درملنه د نارینه ډاکټرانو لهخوا هم منع کړې ده.
