د افغانستان لپاره د اروپايي ټولنې ځانګړي استازي، ژیل برتران، اعلان کړی چې په افغانستان کې یې د استازیتوب دوره پای ته رسېدلې ده.
هغه نن (پنجشنبه، د وږي ۱۹مه) پر «اېکس» لیکلي چې خپل ماموریت په دې باور پای ته رسوي چې «د افغانستان د ملت د ټولو قشرونو ترمنځ خبرې اترې د راتلونکي لپاره یوازینۍ لار ده».
ژیل برتران زیاته کړې: «د دې هېواد ښځې او ځوانان کولی شي د خپل هېواد د لا ښه راتلونکي په جوړولو کې مهمه ونډه ولري.»
هغه ویلي چې افغانستان او د دغه هېواد خلک د اروپا لپاره اهمیت لري او له ۲۰۲۱ کال وروسته د اروپايي ټولنې اصولي تګلاره، پرته له دې چې طالبان عادي یا مشروع وپېژني، د دې اهمیت څرګندونه کوي.
د اروپايي ټولنې پخواني ځانګړي استازي په پای کې ویلي چې له طالب چارواکو سره د ژورو اختلافونو سربېره، له دې ډلې سره هغو درناوي ډکو تعاملاتو ته ارزښت ورکوي چې ده ورسره لرلي دي.
ژیل برتران د تېر لمریز کال په میزان میاشت کې د افغانستان لپاره د اروپايي ټولنې د ځانګړي استازي په توګه معرفي شوی و.
هغه په دې موده کې څو ځله افغانستان ته سفر کړی او په کابل کې یې له طالب چارواکو، ډیپلوماټانو، خبریالانو او مدني فعالانو سره لیدنې او خبرې کړې دي.
ژیل برتران په خپل وروستي سفر کې چې د روان لمریز کال په ثور میاشت کې یې افغانستان ته کړی و، ویلي وو چې اروپايي ټولنه په افغانستان کې د ترهګرو ډلو له حضور څخه اندېښمنه ده.
هغه تر دې وړاندې هم د ښځو او نجونو پر وړاندې د طالبانو پر محدودیتونو نیوکه کړې او د دغو محدودیتونو د لغوه کولو غوښتنه یې کړې وه.
