د امریکا ولسمشر ډونالډ ټرمپ ژمنه کړې چې که جمهوريپالان د نومبر په منځمهالو ټاکنو کې د کانګرس کنټرول وساتي، هر بالغ امریکايي وګړي ته به ۵ زره ډالر ورکړي.
د رویټرز د راپور له مخې، ټرمپ دغه وړاندیز د جمهوريپال ګوند په لومړني منځمهال کنوانسیون کې مطرح کړی، خو سمدستي څرګنده نه شوه چې دغه پیسې به څنګه ورکول کېږي او یا دا چې د قانون له مخې یې عملي کول امکان لري که نه.
په امریکا کې د شاوخوا ۲۷۰ میلیونو بالغو وګړو د نفوس په پام کې نیولو سره، د دې طرحې عملي کول به نږدې ۱.۳۵ ټریلیون ډالر لګښت ولري.
ټرمپ په خپله وینا کې، چې د ټلویزیون د ډېرو لیدونکو په وخت کې یې وکړه او یو ساعت او ۴۵ دقیقې یې دوام وکړ، د هغه څه ستاینه وکړه چې دی یې «د ولسمشرۍ په تاریخ کې تر ټولو ستر دوه کاله» بولي. هغه ځان په مستقیم ډول د ټاکنو په مرکز کې راوست؛ دا په داسې حال کې ده چې د نوموړي محبوبیت نور هم کم شوی دی.
خو رویټرز لیکلي چې لا څرګنده نه ده چې ایا دا وینا، چې تر ډېره د انتخاباتي کمپاین د ویناوو په څېر وه، کولی شي د هغو بېطرفه او پرېکنده رایه ورکوونکو ملاتړ ترلاسه کړي که نه. د نظرپوښتنو پایلې ښيي چې دغه رایه ورکوونکي د ژوند د لګښتونو د زیاتېدو او له ایران سره د جګړې په ترڅ کې له ټرمپ او د هغه له ګوند څخه واټن نیسي.
ټرمپ وویل: «موږ د امریکا راتلونکی افراطي کیڼ اړخو دیموکراتانو ته سپارو، او زموږ ملت به راتلونکې لسیزه د دې لپاره تېره کړي چې بېرته پر خپلو پښو ودرېږي. جمهوريپالو ته رایه ورکړئ، او موږ به د راتلونکو نسلونو لپاره نړۍ تر شا پرېږدو.»
په دالاس کې دوه ورځنۍ غونډه، چې ټرمپ به نن خپله وروستۍ وینا هم پکې وکړي، ښيي چې د جمهوريپال ګوند برخلیک تر کومې کچې له ټرمپ سره تړلی دی. دغه غونډه د نومبر د درېیمې نېټې د منځمهالو ټاکنو په درشل کې د دې ګوند تګلاره هم څرګندوي.
پر ټرمپ تمرکز کول په حقیقت کې پر یوه لوړخطره شرط لګولو ته ورته دي؛ یعنې دا باور چې نوموړی کولی شي هغه رایه ورکوونکي بېرته بسیج کړي چې دوه کاله مخکې یې هغه د ولسمشرۍ څوکۍ ته رسولی و. دا په داسې حال کې ده چې عمومي نظرپوښتنې ښيي د ولسمشر محبوبیت خپل تر ټولو ټیټ تاریخي کچې ته رسېدلی دی.
ټرمپ ژمنه کړې چې د ټاکنو تر ورځې پورې په پاتې اتو اوونیو کې به څو ځله هغو ایالتونو او انتخاباتي حوزو ته سفر وکړي چې د ټاکنو په پایلو کې پرېکنده اهمیت لري.
