امریکايي رسنۍ «سيبياېس نیوز» راپور ورکړی چې د ایران له خوا په اردن کې د «موفقالسلطي» هوايي اډې پر ضد په بریدونو کې د امریکا څو پوځي الوتکې زیانمنې شوې دي.
سرچینو ویلي چې د F-15 ډوله اته جنګي الوتکې لږ زیانمنې شوې دي او ویل کېږي چې بېرته خدمت ته سپارل شوې دي.
هغه کسان چې له موضوع سره نږدې اشنا دي، د نوم نه ښودلو په شرط ویلي چې د A-10 «تاندربولټ»، چې په «وارتهوګ» (Warthog) مشهور دی، یوه الوتکه هم په نښه شوې او د هغې یوه وزر له منځه تللی دی.
تر اوسه په اردن کې د ایران په بریدونو کې د امریکايي ځواکونو د وژل کېدو کومه پېښه نه ده راپور شوې.
دغه زیانونه په هغو شپنیو بریدونو کې رامنځته شوي چې یوه ورځ وروسته له هغې وشول چې امریکا د سېشنبې په ورځ اعلان وکړ چې د یوه امریکايي سمندري جنګي بېړۍ له په نښه کېدو وروسته یې د ایران پر پنځو تېل وړونکو بېړیو برید کړی دی.
د ایران اسلامي سپاه پاسداران په غبرګون کې اعلان وکړ چې دوی پر اتو تېل وړونکو بېړیو او دوو جنګي بېړیو، او همدارنګه په اردن کې د امریکا پر پوځي اډه، بریدونه کړي دي.
«سيبياېس» موندلې چې په اردن کې امریکايي ځواکونو د ایران د بریدونو د مخنیوي لپاره له ۳۰ څخه زیات «پېټریاټ» توغندي توغولي دي.
«سيبياېس» تر دې مخکې راپور ورکړی و چې امریکايي چارواکو د «پېټریاټ» توغندیو د زېرمو د چټک کمېدو، او همدارنګه د نورو دقیقو هدایت کېدونکو مهماتو، په اړه اندېښنه څرګنده کړې ده.
