د ملګرو ملتونو د کډوالو عالي کمېشنر عرفات جمال افغانستان ته د خپل سفر پر مهال د طالبانو د کډوالو او راستنېدونکو چارو له وزیر، مولوي عبدالکبیر، سره لیدلي دي.
د طالبانو د کډوالو چارو وزارت نن (جمعه، د وږي ۲۰مه) په یوه اعلامیه کې ویلي چې عرفات جمال او عبدالکبیر د افغان کډوالو د ستونزو او له کوربه هېوادونو سره د څو اړخیزو ناستو په اړه خبرې کړې دي.
د ملګرو ملتونو د کډوالو عالي کمېشنر ویلي چې ټاکل شوې راتلونکې میاشت په سویس کې د یوې نړیوالې غونډې په څنډه کې د افغان پناهغوښتونکو د ستونزو د حل او د هغوی د جبري ایستلو په اړه خبرې وشي.
هغه زیاته کړې چې د ملګرو ملتونو د کډوالو عالي کمېشنرۍ له ایران سره هم هوکړې ته رسېدلې چې د افغان کډوالو د ستونزو د څېړلو او حل په موخه به په کابل کې درې اړخیزه غونډه جوړه شي.
د عرفات جمال په وینا، په دې درې اړخیزه غونډه کې به د ایران، ملګرو ملتونو او طالبانو استازي ګډون وکړي.
هغه ویلي چې ملګرو ملتونو د افغان پناهغوښتونکو د ستونزو د حل لپاره هڅې پیل کړې او د اړینو مالي سرچینو د برابرولو لپاره یې هم یو پلان چمتو کړی دی.
د طالبانو د کډوالو او راستنېدونکو چارو وزیر، مولوي عبدالکبیر، ویلي چې «د راستنېدونکو لپاره اړینې مرستې او همکارۍ» برابرې شوې دي.
هغه د افغان پناهغوښتونکو په اړه د ناستو جوړېدل ستایلي او دغه ناستې یې «اغېزمنې او مهمې» بللې دي.
د ملګرو ملتونو د کډوالو عالي کمېشنر افغانستان ته په داسې حال کې سفر کوي چې د ملګرو ملتونو د راپورونو له مخې، په تېرو دوو کلونو کې له ایران او پاکستان څخه څه باندې ۳.۹ میلیونه افغان کډوال بېرته افغانستان ته ستانه شوي دي. همدارنګه یو شمېر اروپايي هېوادونو، د جرمني او اتریش په ګډون، د افغان کډوالو د ایستلو بهیر هم پیل کړی دی.
ملګرو ملتونو په خپلو راپورونو کې څو ځله ټینګار کړی چې راستنېدونکي له افغانستان ته له رسېدو وروسته له سختو شرایطو سره مخ دي. دوی سرپناه او بنسټیزو خدمتونو، لکه زدهکړو، کاري فرصتونو، روغتیايي خدمتونو او حتا پاکو اوبو ته کافي لاسرسی نه لري. ملګري ملتونه وايي، واک ته د طالبانو له رسېدو وروسته د نړیوالو مرستو کمېدو هم د بېرته راستنو شویو کډوالو د ستونزو د حل بهیر لا ستونزمن کړی دی.
