د طالبانو د بهرنیو چارو وزارت ویلي چې په کابل کې یې د پاکستان سفارت سرپرست احضار کړی او د «ډیورنډ کرښې له هغې غاړې څخه د نورستان پر لوري د وسلهوالو ورانکارو عناصرو د ننوتلو» په اړه یې خپل اعتراضي لیک هغه ته سپارلی دی.
دغه وزارت نن (سهشنبه، د تلې ۷مه) ویلي چې طالبان «په پاکستان کې د پوځي رژیم تر کنټرول لاندې سیمو کې د ورانکارو عناصرو د جذب، تنظیم، روزنې او تجهیز لپاره د زمینه برابرولو او وروسته د پاکستان د پوځ له لوري د هغوی د ډیورنډ کرښې دې غاړې ته د رهبري او لېږدولو چارې په کلکه غندي.»
د طالبانو د بهرنیو چارو وزارت زیاته کړې چې «د پاکستان د پوځي رژیم دا اقدامات د افغانستان د حاکمیت او ځمکنۍ بشپړتیا ښکاره نقض دی او له اسلامي، نړیوالو، بشري او حسن ګاونډیتوب له اصولو سره په ټکر کې دي.»
دغه وزارت خبرداری ورکړی چې د دا ډول «غیرمسوولانه او بېپروا اقداماتو» دوام او د هغو ناوړه پایلې به په بشپړه توګه د پاکستان د پوځي رژیم پر غاړه وي.
د «افغانستان د ازادۍ جبهې» دوه ورځې مخکې د نورستان د کامدېش ولسوالۍ کې له طالبانو سره د نښتې خبر ورکړی و. دې جبهې ادعا کړې وه چې په دغه نښته کې د طالبانو ۳۷ غړي وژل شوي او ۲۴ نور ټپیان شوي دي.
د طالبانو دفاع وزارت هم دغه نښته تایید کړې او په کې ښکېل کسان یې «داعشي فتنهګر او د شر او فساد عناصر» بللي دي. دغه وزارت ویلي چې یاد کسان له پاکستانه افغانستان ته لېږل شوي وو.
د طالبانو دفاع وزارت ادعا کړې چې د طالبانو د ځواکونو د بریدونو په پایله کې ۲۸ کسان وژل شوي او ۳۲ نور نیول شوي دي.
خو د پاکستان د اطلاعاتو او خپرونو وزارت د طالبانو د دفاع وزارت ادعا رد کړې او هغه یې «بېځایه او بېاساسه» بللې ده. دغه وزارت ویلي چې په دې نښته کې د پاکستان د لاس لرلو لپاره هېڅ ډول شواهد نه شته.
