د امریکا متحده ایالاتو په قطر کې د سیلیه کمپ د فعالیت موده، چې له زرو څخه ډېر افغان پناهغوښتونکي پکې اوسېږي او ټاکل شوې وه چې نن چهارشنبه، د میزان په ۸مه، وتړل شي، د نورو نهو میاشتو لپاره وغځوله.
د اسوشیتدپرس خبري اژانس د یوه امریکايي چارواکي له قوله راپور ورکړی چې د شوې هوکړې له مخې به دغه کمپ خپلو فعالیتونو ته دوام ورکړي.
په سیلیه کمپ کې ۱٬۰۳۹ افغان پناهغوښتونکي له کلونو راهیسې امریکا ته د انتقال په تمه دي. له دوی څخه تر ۷۰ سلنې ډېرې ښځې او ماشومان دي.
د روان کال په جون میاشت کې راپورونه خپاره شول چې د امریکا حکومت غواړي دغه کسان، چې ډېری یې د پخوانیو هغو افغانانو د کورنیو غړي دي چې له امریکايي پوځ سره یې کار کړی، د افریقا هېواد کانګو ته ولېږدوي.
وروسته د کډوالو د ملاتړ ادارو او د امریکا د کانګرس ځینو غړو له حکومت څخه وغوښتل چې دا پرېکړه لغوه کړي او دغه پناهغوښتونکي د امریکا خاورې ته انتقال کړي.
په وروستي اقدام کې، د کانګرس څلورو غړو تېره ورځ د امریکا د بهرنیو چارو وزارت او د کورني امنیت وزارت ته په یوه لیک کې غوښتنه کړې چې دغه پناهغوښتونکي له بېسرنوشتۍ څخه وژغوري او د ۲۰۲۷ مالي کال په ترڅ کې یې له سیلیه کمپ څخه امریکا ته انتقال کړي.
د تېر کال په ترڅ کې امریکا ته د افغان وګړو د ننوتلو له بشپړ بندیز وروسته، یوازې پنځه افغان پناهغوښتونکي توانېدلي چې د امریکا د کډوالۍ قانون له استثنايي لارو څخه په استفادې دغه هېواد ته داخل شي.
