د طالبانو د پنجشېر والي ویاند سیفالدین لتون، په دغه ولایت کې د «شنه بهیر» د دې ادعا په غبرګون کې چې ګواکې ځواکونو یې یوه چورلکه راغورځولې، ویلي چې یوه چورلکه د ناستې پر مهال په یوه نامناسب ځای کې له ډبرې سره لګېدلې او لږ زیانمنه شوې ده.
د طلوع نیوز د راپور له مخې، سیفالدین لتون ویلي چې په پنجشېر کې د چورلکې په تړاو هېڅ امنیتي پېښه نه ده رامنځته شوې.
هغه د دې چورلکې د پېښې په اړه نور جزییات نه دي ورکړي.
د «شنه بهیر» پوځي څانګې، «شنې قطعې» ادعا کړې چې ځواکونو یې په پنجشېر کې د طالبانو یوه چورلکه راغورځولې ده.
شنه بهیر پر اېکس ټولنیزې شبکې په خپره کړې خبرپاڼه کې ویلي چې دغه چورلکه پرون چهارشنبه، د تلې په ۱۵مه، د سهار شاوخوا ۷:۱۵ بجې په نښه شوې ده.
شنې قطعې ویلي چې د راغورځول شوې چورلکې پاتې شوني د آرزو درې په سیمه کې پراته دي.
د دغې قطعې په ادعا، د چورلکې دوه پیلوټان، چې «عبدالعظیم» او «محمد نعیم» نومېږي، سخت ټپیان شوي او په کابل کې د سردار محمد داوود خان ۴۰۰ بستریز روغتون ته لېږدول شوي دي.
شنه بهیر وايي چې دغه چورلکه د طالبانو د هوايي ځواکونو د ارکان رئیس، ملا نقیبالله مقیم، لېږداوه.
دغه پوځي ډله چې د افغانستان د پخواني ولسمشر د مرستیال امرالله صالح تر مشرۍ لاندې فعالیت کوي، وايي چې راغورځول شوې چورلکه د هغو هندي چورلکو له ډلې وه چې د افغانستان پخواني جمهوري نظام پوځ ته ډالۍ شوې وې.
په پنجشېر کې ځايي سرچینې د آرزو درې شاوخوا سیمو کې په ټیټه ارتفاع د چورلکې الوتنه تاییدوي، خو وايي چې خلک د سیمې غرني موقعیت ته لاسرسی نه لري.
