د تخار ولایت لپاره د طالبانو امنیه قوماندانۍ اعلان کړی چې له یوه شخصي امبولانس څخه یې ۶۱۴ کیلوګرامه تریاک کشف او ضبط کړي دي.
د دغې قوماندانۍ ویاند نقیبالله مسرور ویلي، دغه امبولانس د تخار په مرکز تالقان ښار کې پېژندل شوی او له بدخشان ولایت څخه راغلی و.
مسرور ویلي، دا په تېره شاوخوا یوه میاشت کې په تخار کې له امبولانس څخه د نشهيي توکو د نیولو دویمه پېښه ده. د هغه په وینا، ۲۰ ورځې وړاندې هم له یوه بل امبولانس څخه ۴۲۰ کیلوګرامه تریاک کشف او ضبط شوي وو.
هغه د دغو نشهيي توکو د قاچاق په تړاو د چا د نیول کېدو په اړه څه نه دي ویلي.
د طالبانو امنیتي مسوولان هره ورځ د نشهيي توکو د نیولو خبرونه ورکوي.
د نشهيي توکو قاچاق په داسې حال کې دوام لري چې طالبان ادعا کوي، په افغانستان کې د کوکنارو کښت صفر ته رسېدلی دی.
ملګري ملتونه هم په افغانستان کې د کوکنارو د کښت د ۹۰ سلنه کموالي خبره تاییدوي، خو وايي چې د قاچاقبرانو په زېرمو کې لا هم نشهيي توکي شته دي.
افغانستان په تېرو وختونو کې په نړۍ کې د نشهيي توکو د تولید له سترو سرچینو څخه ګڼل کېده.
د افغانستان په سوېل کې د نشهيي توکو لویه برخه تولیدېده، خو په وروستیو کلونو کې د هېواد په شمال ختیځ کې د کوکنارو د کښت راپورونه ورکول کېږي. ملګري ملتونه وايي، د کوکنارو د کښت جغرافیه له سوېل څخه شمال ختیځ ته بدله شوې ده.
