“Dekabrın 30-da “SOCAR Polymer” zavoduna elektrik enerji təminatının kəsilməsi nəticəsində zavodun məşəl qurğusundan atmosferə tüstünün atılması baş verib. Dərhal görülmüş tədbirlər nəticəsində yüzlərlə qurğulardan ibarət zavodda bütün prosesləri qəza şəraitinə uyğun qaydada dayandırmaqla tüstünün havaya atılmasını dayandırmaq mümkün olub”.
“Report” xəbər verir ki, bu barədə “SOCAR Polymer” MMC-dən bildirilib.
Qeyd edilib ki, “SOCAR Polymer” zavoduna elektrik enerjinin təchizatı zavodun yerləşdiyi Sumqayıt Kimya Sənaye Parkı (SKSP) tərəfindən təmin olunur. İlkin məlumata görə, elektrik təminatının kəsilməsinə səbəb SKSP-də yüksək gərginlikli elektrik xəttində baş vermiş qeyri-sabitlik olub. Yaranmış nasazlıqlar aradan qaldırılandan sonra, “SOCAR Polymer” zavodunun yenidən işə salınması üçün 2 gün tələb olunur.
Bildirilib ki, ən müasir texnologiyalar əsasında qurulub tikilmiş “SOCAR Polymer” zavodunda istehsalat prosesləri ərzində yarana biləcək hər hansı zərərli maddələrin zərərsizləşdirilərək kənarlaşdırılmasını təmin edən qurğu və nəzarət sistemləri mövcuddur.
“Hətta normal şəraitdən kənar olan hallarda, zavodun kompüterləşdirilmiş nəzarət və idarəetmə sistemi yarana biləcək müxtəlif mənfi hallara qarşı təcili həll yollarını avtomatik surətdə təklif edərək şəraitin normallaşdırılmasına qədər bir sıra həlledici tədbirlərin keçirilməsini təmin etməyə qadirdir. Zavodun lisenziarları “LyondellBasell”və İNEOS şirkətləri bir çox ölkələrdə inşa edilmiş eyni tipli zavodların çoxillik istismarı əsasında öyrəndiyi dərsləri və çıxardığı nəticələri cəmləşdirərək bu növ zavodların dizayn və mühəndis layihələrinin təkmilləşdirilməsi məqsədilə tətbiq edib. Azərbaycanda inşa edilmiş polipropilen və yüksəksıxlıqlı polietilen qurğuları həmin qabaqcıl təcrübəyə əsaslanmaqla layihələndirilərək inşa edilib. Zavodun avtomatlaşdırılmış nəzarət və idarəetmə sistemlərinin işləməsi üçün şərt, əlbəttə ki, elektrik enerji təminatının kəsilməməsidir”,- deyə şirkətdən bildirilib.
Amma ekspertlərin fikrincə, baş verən hadisə bir daha ölkənin enerji təhlükəsiliyində ciddi böşluqların olduğunu göstərir. Çünki zavodda baş verən hadisənin əsas səbəbi kimi elektrik enerji təminatının kəsilməsi qeyd edilir. Məhz enerjinin dayandırılması nəticəsində zavodun məşəl qurğusundan atmosferə tüstünün atılması baş verib. Ekspertlər eyni zamanda rəsmi məlumatda məsuliyyətin başqa qurumun üzərinə atılmasına da diqqət çəkir. Açıqlamada qeyd olunur ki, “SOCAR Polymer” zavoduna elektrik enerjinin təchizatı zavodun yerləşdiyi Sumqayıt Kimya Sənaye Parkı (SKSP) tərəfindən təmin olunur. İlkin məlumata görə, elektrik təminatının kəsilməsinə səbəb SKSP-də yüksək gərginlikli elektrik xəttində baş vermiş qeyri-sabitlik olub. Amma yaranmış nasazlıqlar aradan qaldırılandan sonra, “SOCAR Polymer” zavodunun yenidən işə salınması üçün 2 gün tələb olunması əslində baş verən olayın fəsadının nə dərəcədə ağır olduğunu göstərir.
Digər tərəfdən “SOCAR Polymer” kimi müasir tipli zavodllarda bu cür fövqəladə hallar baş verəndə xüsusi təhlükəsizlik sistemi işə düşməlidir. Zavoda verilən elektrik enerjisinin gözlənilmədən kəsilməsi dərhal fövqəladə hallar üçün nəzərdə tutulan ehtiyat generatorunu işə salmalıdır. Ekspertlərin sözlərinə görə, bu təhlükəsizlik sistemi zavodun işinin əvvəlki rejimdə davam etməsinə deyil, qurğuların təhlükəsiz şəkildə söndürülməsinə xidmət edir. Zavodda məhz bu sistemin işə düşərək, məşəl qurğusundan atmosferə tüstünün atılmasının qarşısını niyə almadığı sual doğurur.
azadliq.info
