Uşaq pulu! Azad seçki! Qarabağa azadlıq! Striptiz yox-Parlament! Siyasi məhbuslara azadlıq! Tibbi sığorta! Neft sahəsində şəffaflıq!
19 oktyabr mitinqi ilə bağlı qərar qətidir! Aksiya BŞİH tərəfindən razılaşdırılıb-razılaşdırılmamasından asılı olmayaraq keçiriləcək. Milli Şura rəhbərliyi 9 aydır konstitusiyanı pozan hakimiyyətin nazı ilə oynamayacağını bəyan edib. 9 aydır heç bir tutarlı səbəb göstərmədən aksiyaları qadağan edən hakimiyyət haray salır ki, mitinqə gələnlər xalqın istirahətinə mane olurmuş. Guya indi bunlar xalqın qeydinə qalan olublar. Guya illərdir şəhərin mərkəzi küçələrini xalqın üzünə bağlayıb, 100 milyonlar bahasına “Formula” yarışı keçirən bunlar deyil. Guya ölkəni illərdir talayan, neft milyardlarını dədə malı kimi dağıdan, yetim-yesirin haqqını yeyən, xalqı yoxsulluq girdabına salan bunlar deyil. Guya şəhərin mərkəzində yaşayan minlərlə insanı ata-baba evlərindən zorla çıxarıb, mülklərini ələ keçirən bunlar deyil. Hələ öz yalanlarına don geyindirmək üçün zəhmətkeş məktubları təşkil etdirib, “Məhsul” stadionunu “təmirə” də bağlayıblar. Bağlasınlar! Xalq da 8 oktyabr aksiyası ilə sübuta yetirdi ki, şəhərin mərkəzinə çıxıb bütünlükdə ölkəni “təmir etmək” istəyir. Xalq o gün hakimiyyətə mesaj verdi ki, çox yaxında onun bütün dekorlarını söküb kənara atacaq və ölkəni tamamilə yenidən quracaq!
Xalqı aşağılayan, əzən, insan yerinə qoymayan bu rejim gedəcək!
Bu ölkənin köklü dəyişikliyə ehtiyacı var. Gedib Aşqabadda 92-ci il hakimiyyətini söyməklə deyil ki, dünyanın hər yerindən bu hakimiyyət eyni şəkildə görünür. Rejimin bütün vintləri laxlayıb, ölkəni gerçək qəza vəziyyətinə gətirib çıxarıblar. İnsanlar yoxsulluq, ehtiyac içində, bütün demokratik təsisatlar, seçki institutları sıradan çıxarılıb, həbsxanalar dolub daşır. Neftdən gələn milyardların sorağı dünyanın ən bahalı istirahət zonalarından, ofşorlardan, şəxsi hesablardan gəlir. O milyardlardan bu xalqa heç nə çatmadı, eləcə Əliyev rejiminin kisəsinə axıb getdi. Diqqət etmirsinizmi “vurulan” hər nazirin evindən 2-3 milyard çıxır. Hələ adamların xaricə ötürdükləri kisə-kisə brilyantları, bivec və tüfeyli övladlarının adına aldıqları mülkləri, açdıqları şirkətləri demirik. Bu hakimiyyət qanunların üstündə oturub qatı bir istibdad rejimi yaradıb ölkədə. Hər addımda xalqı aşağılayan, əzən, insan yerinə qoymayan rejimin özbaşınalığı hüdud tanımır. O dərəcədə də harınlayıblar ki, ölkənin bütün sərvətlərini babalarından miras aldıqlarını düşünürlər, kimə necə gəldi paylayırlar. Bircə bu ölkənin insanına xərcləməyə canları çıxır. İmkansız ailələrə uşaq pulu qıymayacaq qədər acgöz və qəddardır bu rejim. Bir qol saatına 2 milyon avro verib, sonra da onu oğurladan, bir milyon manat ödəyib ayı kəsdirib yeyən, ölkənin oğurluq pulları ilə uzaq xaricdə kazinolar kralına çevrilən övladlar yetişdirib bu hakimiyyətin yüksək rütbəli məmurları. Ölkə daxilində feodal qaydaları, ölkə xaricində imicimiz yerlə bir!
Bir daha “ilin xalqı” olmağın zamanıdır!
19 oktyabr mitinqinin əsas tələbləri bunlardır: Uşaq pulu! Azad seçki! Qarabağa azadlıq! Siyasi məhbuslara azadlıq! Tibbi sığorta! Hər kəsin ürəyindən tikan çıxaran tələblər deyilmi? Bu tələblərin yerinə yetirilməsinə nail olmaqla, həyatımız köklü dərəcədə dəyişməzmi? Azad seçki institutunun bərpası ilə bu rejimin süqutu faktiki olaraq reallaşmazmı? O zaman 19 oktyabr mitinqi üçün birlik olmaq zamanı! Çevrəmizlə, yaxınlarımızla işləyib aksiya xəbərinin hər kəsə çatmasına çalışmalıyıq. Bu mitinqin həyatımızı gerçəkdən dəyişə biləcəyinə inandırmalıyıq insanları. Bu düzənin belə gəlib, belə getməyəcəyinə inandırmalıyıq hər kəsi. Meydanlara çıxmaq zamanıdır, Azərbaycan xalqı! Bir daha “ilin xalqı” olduğunu sübuta yetirməyin zamanıdır!