Ölkə müxalifətinin Bakının mərkəzində aksiya keçirməyə hazırlaşdı ərəfədə prezident Soçidən Paşinyana cavab göndərib-“Qarabağ Azərbaycanındır, nida!”. Bu mesajın səsləndiyi vaxtdan bir az əvvəl SOCAR-ın mühafizə dəstəsi Bakının ortasında Qarabağ qazilərinə divan tuturdu. Bilirsiniz, nə üçün? Evsiz-eşiksiz bir qazi özünə fərdi yaşayış evi tikmək istədiyi üçün. Hələ muzdla ələ aldıqları saytlarda şivən salıb deyirlər ki, qarşıdurma tikilən ev qanunsuz olduğuna görə yaranıb. Adamlar ətrafda boy-boy tikilən evləri kor kimi görməzdən gələrək bunu deyir. Guya millət çörəyi qulağına yeyir və anlamır ki, ərazidəki bütün “qanunsuz” evlər SOCAR Tİ-nin rəisi Rəşad Əliyevə haqq ödənilərək “qanuniləşir.” Bəli, canıyla qoruduğu torpağında yaşayacaq bir evi olmayan qazidən belə rüşvət umacaq qədər qansızlaşıb bu ölkənin məmurları. Kim qorumalıdır bu vətən, bu torpaq üçün canının bir parçasını vermiş o qazilərin hüquqlarını? Əlbəttə, vətən fədailərinə sən özün sahib çıxmalısan, əziz Azərbaycan xalqı! 19 oktyabr aksiyası məhz ölkədə baş alıb gedən özbaşınalıqlara “dur” demək məqsədilə təyin olunub. O gün o aksiyada iştirak edib, etiraz səsini ucaltmaq sənin haqqın və borcundur!
Bir də “Qarabağ Azərbaycanındır” deməklə iş bitmir, ağalar. İllərdir bu quru sözləri eşidə-eşidə dururuq. Cəbhə xəttindən hər gün şəhid xəbərləri gəlir. İllərdir bu hakimiyyətin qazilərə düşmən münasibəti dəyişmir. Xatırlayın, öz haqları üçün küçəyə çıxan qazilərin aksiyasında Qarabağ müharibəsi veteranlarının sədri Etimad Əsədovun protezini qırıb yerdə sürüklədilər. Qazi Oruc Məmmədəliyevi həbs etdirib məhkəmə qarşısına çıxardılar. Zaur Həsənovu kredit borcuna görə özünü yandırmağa məcbur etdilər. Siyasi baxışlarına görə Asif Yusiflini, Əfqan Muxtarlını həbsdə çürütdülər, Babək Həsənliyə olmazın işgəncələr verdirib həbsə atdılar. Şəhid ailələrini 11 min manat qanpulu üçün illərlə sürüm-süründürdülər. Siz bunlardan vətən, millət, xalq təəssübümü gözləyirsiniz? Gözləməyə dəyməz. O insanların gerçək haqqı bu sistem dəyişdikdən sonra veriləcək. Hakimiyyətə gerçək milli qüvvələr gəldikdən sonra onlar əsl dəyərlərini alacaq. Təkcə bunun üçün 19 oktyabrda meydanda olmağa dəyməzmi? Qazisinə, şəhidinə qiymət qoymayan bir xalqın sabahı, gələcəyi olmaz. Ölkənə, torpağına, vətən qazilərinə sahib çıxmağın zamanıdır, əziz xalq!