Əli Kərimli: “Hakimiyyət daha bir seçkini oğurlamağa hazırlaşır”
YAP Siyasi Şurası ölkə başçısı İlham Əliyevə parlamentin buraxılması və növbədənkənar parlament seçkilərinin təyin olunması üçün müraciət edib. Siyasi Şura bu qərarın “Prezident İlham Əliyevin islahatlar kursuna və kadr islahatlarına dəstək məqsədilə” verildiyini qeyd edib. Qərar Sİyasi Şuranın noyabrın 28-də keçirilən iclasında qəbul edilib.
YAP-ın icraçı katibi Əli Əhmədov iclasdan sonra keçirdiyi brifinqdə deyib ki, Siyasi Şuranın tövsiyəsilə partiyanın deputatları Milli Məclisə artıq müraciət edib: “Məktubda parlamentin deputatlarına təklif olunur ki, Milli Məclisin buraxılması ilə bağlı prezidentə müraciət edilsin. İnanırıq ki, yaxın zamanlarda bu məsələ Milli Məclisdə müzakirə ediləcək”.
“Qüvvələr nisbətinin necə dəyişəcəyini bilmirlər, ona görə də tələsirlər”
Bu xəbər geniş ictimai müzakirəyə səbəb olub. AXCP sədri Əli Kərimli facebook səhifəsində bununla bağlı status paylaşıb. Yazıda deyilir: “Parlament ona görə seçkiyə 1 il qalmış buraxılır ki, rejim seçkiləri qəfil və qışın ən soyuq aylarında keçirdib, növbəti dəfə saxtalaşdırsın. Başa düşürlər ki, indi etiraz elektoratının sayı günbəgün artır, xalq çox sürətlə təşkilatlanır. Gələn ilin payızına kimi ölkədə qüvvələr nisbətinin necə dəyişəcəyini hökumət də bilmir. Ona görə də tələsirlər. İndi təsdiq olunur ki, İlham Əliyevin anti-Avropa bəyanatları da daha bir seçkini saxtalaşdırmaq üçün verilirmiş. Əlbəttə ki, yaranmış yeni situasiya və nə etməli olduğumuz Milli Şura və AXCP strukturlarında ciddi müzakirə olunacaq. Ancaq bir şeyi əminliklə deyə bilərəm. Bunlardan islahat, azad seçki, filan gözləməyin. Daha bir seçkini oğurlamağa çalışırlar”.
Əli Kərimli məsələ ilə bağlı Azadlıq radiosuna və MeydanTV-yə müsahibə də verib.