Yeni parlamentdə Animasiya qəhrəmanı Dadaşlinskinin də “yeri göynəyir”
Azərbaycan teleməkanı yeni fikrə və açıq sözə o qədər acdır ki, ekrana fərqli proqramla çıxan müəllif anında qəhrəmana çevrilir. Televiziyaların yalan üyüdən boz mühitində bunu yaxşı başa düşmək olar. Elə götürək İTV-də tamamilə yeni tərzdə 3D animasiyası ilə hazırlanmış proqrama. Dadaşlinski ləqəbli şərti aparıcının təqdimatında yayımlanan müəllif proqramı qısa zamanda babat seyrçi kütləsi toplaya bilib. Müəllif də Dadaşlinski adlı FB profilində TV-yə böyük iddiayla çıxdığını bildirib: “Heç kimin soruşa bilmədiyini mən soruşacağam! Hadisələrə heç kimin baxmadığı bucaqdan baxacağam.”
Bu təqdimat öz yerində. Amma bizi maraqlandıran proqramın özündə baş verənlərdir. Verilişə dəvət alan qonaqların statusu, onlara ünvanlanan suallar, yüksək çinli qonaqların ekran qarşısında yaşadığı çaşqınlıq, müəllifin onlardan söz qoparma işləkləri də öz yerində. Ən azı ona görə ki, bu suallar verəcək real media mənsubları çoxdan sıradan çıxarılıb. Onlardan bir çoxunun qəzet və saytları bağlanıb, bir çoxunun da üzünə TV məkanı qapalıdır. İndi ortaya Dadaşlinski adlı bir simvolik obraz çıxıb bu boşluqda qurdalana bilirsə, nə gözəl! Milli Məclisin deputatları ilə bir neçə müsahibəsini izlədikdən sonra seyrçilərə haqq verdik ki, bu məharəti ilə onu deputat yox ee, lap vitse-prezident də təyin etmək olar. (Birinci vitse- prezident yox). Adam robot rolunda belə bu deputatların 90%-dən yaxşı işləyir. Cəsarəti də öz yerində, deputatları məhşər ayağına çəkib, onları çıxılmaz vəziyyətə belə sala bilir.
Dadaşlinskinin deputatlarla müsahibələrində çox maraqlı məqamlar var. O, mühüm qonaqlarını tikan çıxaran sərt suallara tutur. Deputatlar da zaman-zaman çaşıb qalır və suallardan yayınmaq üçün çapalayır.
Deputat Aqil Abbasla maraqlı dialoq yaşanır. “Yoxsulluğa qarşı soğanla mübarizəniz nəticə verdimi” sualının cavabında deputat məsələnin kontekstdən çıxarıldığını deyir. Sonra növbəti sual gəlir: “Gürcüstanda pul yoxdur deyə rüşvət vermirlər” sözləri də kontekstdən çıxarılıb? Ardınca deputatın benzinin bahalaşması ilə bağlı daha bir “aforizmini” xatırladır. Eyni şəkildə dialoq Hadı Rəcəbli, Adil Əliyev, Araz Əlizadə ilə də yaşanır. Bu şəkildə deputatları müttəhimlər kürsüsündəki kimi danışdırıb paxırını açır Dadaşlinski. Adil Əliyevi danışdırıb dolaşdırdığı kimi: ”Qanunvericiliklə millət vəkili bizneslə məşğul ola bilməz. Hesab edirəm ki, millət vəkili imkanlı insanlardan olmalıdır. Mənim düşüncələrim budur. Millət vəkilinə qarşı evi satıb başqa yerdə daha ucuzunu və yaxud da bahasını tikdirə bilməzsən kimi qadağa qoyula bilməz.” “Cümlə qura bilməyən deputatın məsuliyyətini onun seçiciləri daşıyır” fikirlərini səsləndirən deputat günlərcə sosial şəbəkələrə məsxərə olmuşdu.
İndi özünüz deyin, bu “Striptiz” Məclisin içində ortaya Dadaşlinski kimi doğruları danışan birini çıxara bilərsiniz? Ən azı, o cəsarətdə birini tapa bilərsiniz, çıxsın deputatından tutmuş nazirinə kimi hamının paxırını açsın töksün ortaya? Boşuna axtarmayın, çünki elə biri yoxdur. Bir də durub vitse-prezidentliyə ya da deputatlığa doğru-dürüst kadr axtarırsınız.
Elə Dadaşlinskini təyin edin deputat, məsələ bitsin getsin! Guya ora təyinin olunanlar animasiya qəhrəmanından artıq iş görürülər?