Buraxılan parlament tarixdə hansı rüsvayçılıqlarla qalacaq?
Bu gün buraxıldığı rəsmən bəyan olunan parlament tarixdə hansı rüsvayçılıqları ilə qalacaq? Yəqin ki, ilk növbədə ölkənin qanunverici orqanına rəhbərlik edən Oqtay Əsədovun ləkəli imici ilə. Onun xarici ölkələrə səpələnmiş ailə üzvlərinin bahalı mülklərindən, şirkətlərindən tutmuş striptiz-bar biznesinə qədər biabırçı qalmaqallara qarışmış adı ilə. Doğrudur, 2005-ci ilə qədər onun gəlirləri ölkənin su-kanalizasiya sistemindən çıxıb və həmin dövrdə də qazandığı milyardlar idi. Onun su-kanalizasiya sistemindən “qazandığı pulun qatını balta kəsməz” deyən də özgəsi deyil, öz mühafizəsinə rəhbərlik edən yaxın qohumu Rəşaddır. Amma Əsədova bu milyardlar az idi, ona böyük milyonlar qazandıran yol su-kanalizasiya sistemindən parlamentə transferindən sonra davam edib. Milli Məclisdə ciddi yeyintilər haqqında söz söhbətlər də məhz onun spiker postuna gəlişindən sonra başlanıb. O vaxt mətbuatda bununla bağlı çox sayda yazılar gedib. Milli Məclisin yeni korpusunda su və kanalizasiya sisteminin quraşdırılması layihəsinin belə ona yaxın adamın rəhbərlik etdiyi “Azkont”a verildiyi məlum olub: “Prezident Administrasiyasındakı müvafiq nəzarət şöbəsi Milli Məclisə dövlət büdcəsindən ayrılan vəsaitlərin təyinatı üzrə xərclənib-xərclənmədiyini, yeni korpusun tikintisində yol verilən mənimsəmələri araşdırıb. Bu zaman külli miqdarda yeyinti aşkarlanıb… Milli Məclisdə yeyinti istiqamətlərindən biri də xarici səfərlərdir. Milli Məclisin III çağırışı zamanı spikerin özünün, ailə üzvlərinin, Rəşid İbrahimovun özünün və ailə üzvlərinin xarici səfərlərinə 4 milyon manat sərf olunub. Keçmiş spiker Murtuz Ələsgərov isə xarici səfərlərə ümumi reysin ”ekonom klas”ında gedib-gəlirmiş. Hazırda Milli Məclisə məxsus 11 maşın və sürücü Əsədovun ailəsinə, yaxınlarına, onların işlərini həyata keçirən şəxslərə xidmət edir. Bundan başqa, spiker xarici səfərləri zamanı yaxın dostlarını da özü ilə aparır”.
Təbii ki, ölkə rəhbərliyi də o zaman mətbuatda yazılan bu faktları bilirdi. Amma nə oldu, Oqtay Əsədov daha iki seçkidə öz postunu qoruyub saxladı. Sosial şəbəkələrdə yayılan vəzifələrin o qiymət siyahısı yadınızdamı? Xüsusi səliqə və sıra qaydası ilə yazılmış bu qiymət siyahısını kim ötürmüşdü sosial şəbəkələrə görəsən? Deputat mandatının 1-2 milyon manat arasında dəyişdiyini boz kardinalın sevimli kadrı Gülər Əhmədovadan eşitmişdik. Parlamentdəki digər vəzifələrin qara bazar qiymətlərini də o siyahıdan öyrəndik. Bu qiymətlər 250 min AZN-lə 50 min AZN arasında dəyişirmiş. Daha yüksək vəzifələrin qiyməti daha yüksək, bir az aşağı pillədəkilərinki nisbətən ucuz. Məsələn, İqtisadi qanunvericilik şöbəsinin sektor müdiri 200 min AZN, baş məsləhətçi 100 min AZN, məsləhətçi 70 min AZN-dir. İnzibati və hərbi qanunvericilik, Sosial qanunvericilik, beynəlxalq münasibətlər şöbələrinin qiymətləri də təxminən eynidir. Bundan daha bahalı şöbələr də var. Məsələn, Dövlət qulluğu və kadr məsələləri şöbəsinin sektor müdiri, o cümlədən Vətəndaşların qəbulu və müraciətlərlə iş şöbəsinin sektor müdiri vəzifələri 250 min AZN-dir. Başqa şöbələrin vəzifə qiymətləri də təxminən bir-birinə yaxındır.
Bəli, bu gün tarixin arxivinə göndərilən parlamentin əxlaq kitabında alınıb-satılmayan heç nə qalmadı. Dinləri, imanları puldan ibarət olan bu adamlar hər şeyi qiymət siyahısına salıb ölkənin axırına çıxdılar. Bir mandata görə mənliyini, ləyaqətini, vicdanını satan minlərlə adam yetişdirdilər bu 26 ildə. Milli Məclisdə hər şeyin alınıb-satıldığını dini inancına görə işdən çıxarılan Beynəlxalq parlament təşkilatları ilə iş sektorunun müdiri Rahim Axundov da açıqlamışdı: “Milli Məclisdə işləyirdim, sektor müdiri idim. Milli Məclisin sədri Oqtay Əsədov məni dini baxışlarıma görə işdən çıxardı… “
Milli Məclisdən dedilər ki, işdən çıxarılma güya xüsusi xidmət orqanlarının təqdimatı əsasında oldu, lakin sonra 200 min dollar istədilər ki, həmin adamı işə bərpa etsinlər. Məlum oldu ki, Milli Məclisdə hər şey pulla alınıb-satılır. Şöbə rəisi və sektor müavini vəzifəsindən tutmuş, süpürgəçi vəzifəsinə qədər hamısını satırlar. Pul spikerlə və aparat rəhbərinə çatır. Orda deputat siyahıları var, deputat olmaq üçün hər namizəddən 1-2 milyon pul istəyirlər. Məclisdə deputatlar öz adamları olan işçiləri qoruyur, otaqlarda hər kəs öz aləmindədir, iş görən yoxdur. Amma öz maraqlarına uyğun olmayan günahsız adamları işdən çıxarırlar.” Bu gün tarixin arxivinə gedən parlamentin başında dayananların dosyesi belə qaranlıq məsələlərlə doludur. Bəlkə də, biz hələ ölkə tarixinin ən qaranlıq səhifələrini yaşadığımızın fərqində deyilik. Görünür ki, hər şeyin zamana ehtiyacı var, hər kəsin qiymətini zaman özü verəcək.