Yeni nazirin adı açıqlandı
Ölkənin siyasi gündəmi qaynayır. Payıza gözlənən fövqəladə hadisə baş verdi-parlamentin buraxılacağı rəsmən açıqlandı. Qeyd olunmalıdır ki, məhz biz bu barədə yazmışdıq. Artıq Prezident ofisindəki kreslolar da əl dəyişməyə başladı. Diktatorun qalın” islahat qovluğu” masada, üzlər yenilənir, köhnələr, Heydər Əliyevin kadrları küncə sıxışdırılır, istefaya göndərilir, amma sistem dəyişmir, hər şey yerində qalır. Kral və kraliça heç yerə getmir, rejim durumun gərgin olduğunu bildiyinə görə, vintləri bir az da sıxır. Və dünən İlham Əliyev Prezident Administrasiyasının tərkibini tamamilə yeniləyib. Bu yaxınlarda Mehriban Əliyevanın siyahısında olan şəxslər arasında da sürpriz adlar elan olunacaq.
Klanlar oyununda bəzi “rokirovkalar” da oldu, məsələn BŞBPİ-nin sabiq rəisi Məhərrəm Əliyev kimi. Dünən o, Əliyevin sərəncamı ilə Prezidentin köməkçisi, Prezidentinin Administrasiyasının Hərbi məsələlər şöbəsinin müdiri təyin edilib. Soruşa bilərsiniz, nədən onun adını dünən təyin olunan köməkçilər sırasında xüsusi qeyd edirik? Şübhəsiz, önəmli səbəbi var. Önəmli səbəb odur ki, bu təyinat yaxında bir çox mühüm post sahiblərinin də vəzifələri ilə vidalaşacağını deməkdir. Bunu Mehriban Əliyevanın ətrafə yaxşı bilir. Məsələn, DİN naziri Vilayət Eyvazov yayda yola salınacaq. Təəccüblənməyin, indiki nazir Eyvazov kimin adamıdır, sizcə? Bəli, Ramil Usubovun. İndi planlar dəyişir, vitse-prezident öz komandasını yığır və onun komandasında DİN naziri kimi görmək istədiyi şəxs V. Eyvazov deyil, başqasıdır. Növbəti mərhələdə Eyvazovu istefaya göndərib, yerinə M. Əliyevin qardaşı Adil Əliyevin gətirmək planı var. V. Eyvazovla birlikdə yola salınanlar arasında Zakir Həsənov, Elçin Quliyev, Kamaladdin Heydərov, Bəylər Eyyubov də var. Bütün güc və hüquq-mühafizə sistemində yenilənmə aparılacaq və Mehriban Əliyevanın kadrları gətiriləcək.
Məhərrəm Əliyevə Ramil Usubovun köhnə haqq-hesabı
Deyəsən, məsələ bir az qarışıq kələfə oxşadı, onun üçün bir az tarixə ekskurs etmək lazım. Keçmiş Daxili işlər naziri Ramil Usubovla BŞBPİ-nin sabiq rəisi Məhərrəm Əliyevin bir-biri ilə köhnə haqq-hesabı var. Onlar hələ eks prezident Heydər Əliyevin vaxtından didişirlər. Tarixə nəzər salsaq, görərik ki, generallar arasındakı əsas çəkişmə Hacı Məmmədov hadisəsindən sonra yaranıb. O hadisələrin pərdəarxasına Məhərrəm Əliyevə edilən hücumlar zamanı danışan deputat Adil Əliyev belə aydınlıq gətirmişdi: “O, öz xarakterinə uyğun olaraq, gördüklərinə susa bilməyib və bu da həmin insanların xoşuna gəlməyib. Yəni ki, mənim bir işçim cinayət törədib, digər işçim isə bunu ictimailəşdirir… Bu cür hallar çox baş verib. Qəribədir, bu insanlar bu gün hakimiyyətdədirlər, Məhərrəm Əliyev isə təqaüddə, lakin Məhərrəm Əliyev evdə otura-otura bu adamların başına dərd olub, xarizması, nüfuzu ilə. Deyilənlərə görə, Məhərrəm Əliyevin rəhbərliyi dövründə Bakı Şəhər Baş Polis İdarəsi DIN-in sabiq əməliyyat müvəkkili Hacı Məmmədovun cinayətlərini açmağa cəhd edib. Lakin bu cəhdin qarşısı alınıb. Adil Əliyev sonrakı fikirlərində daha açıq şəkildə Ramil Usubova eyham vurur: “Məhərrəm Əliyev gecələr rahat yatır, bəziləri kimi külək əsən kimi oyanmır. Fikirləşmir ki, qapı taqqıldadı, gəliblər məni aparmağa…Onlar qorxurlar ki, Məhərrəm Əliyev yenidən hüquq-mühafizə orqanlarında yüksək posta təyin olunar və bunların zibillərini açmaqda davam edər. Qoy, narahat olsunlar, lap lazımdırsa dəli olsunlar. ” Hacı Məmmədov hadisəsində Ramil Usubovun həbs olunmaq təhlükəsi yaşadığını hər kəs bilirdi. Amma sonra toqquşmada Ramiz Mehdiyevin adamı olan Ramil Usubov qalib gəldi. O, Çevik Polis Alayını BŞBPİ-dən alıb nazirliyə tabe etdi, nazir müavinlərinin səlahiyyətlərini əllərindən aldı. O vaxt Məhərrəm Əliyev bunu başa düşmədiyini deyib, vurğulamışdı ki, “bu qurumun şəhər polisinin tabeliyindən çıxarılması mənə anlaşılmaz görünür, görünür, burada bir məqsəd var.”
Mehriban Əliyeva Eyvazovu dəyişməkdə qərarlıdır
Bunlar hardasa 13 il əvvəlin söhbətidir. Hakimiyyətin içindəki klan müharibəsi hələ də davam edir. Üstəlik, bir az da gərginləşmiş formada davam edir. Və belə gərginləşmə fonunda səhnəyə Ramiz Mehdiyev komandasının düşmənləri çıxır. Onun kadrları bircə-bircə vurulub kənara atılır. Göründüyü kimi, şahmat damasındakı fiqurlar yavaş-yavaş aradan götürülür və hədəfdə Eyvazov olduğu daha aydın görünməyə başlayır. İndiki komandanın əsas etibarı ilə vitse-diktatorun xeyir-duası ilə yığıldığı kimsəyə qaranlıq deyil. Sizcə, o, DİN kimi ən kilid nazirliyin başında Mehdiyevin adamının qalmasına razı olarmı? Məhərrəm Əliyevin prezidentik köməkçisi vəzifəsinə gətirilməsi təsadüfdürmü? Qətiyyən. Mehriban Əliyeva prezidentlik karyerası yolunda təhlükə gördüyü hər kəsi təmizləməkdə qərarlıdır. Eyvazovun yerinə Adil Əliyevin gətirilmə planı da təsadüfdən ortaya çıxmayıb. Əliyevlər həmin posta elə birini təyin etmək niyyətindədirlər ki, məlum klanla heç bir bağı olmasın. Hələ arada köhnə düşmənçilik varsa, nə gözəl! Xülasə, Əliyevlər özlərinə yaxın adamları vacib postlara yerləşdirməklə arxalarını gücləndirmək istəyirlər. Hər halda, əmindilər ki, Əliyev qardaşları Əliyevlər hakimiyyətinin gücünə güc qatacaq. Vilayət Eyvazovu yola salmaq üçünsə nə çox bəhanə. İndiyə qədər törətdiyi cinayət dosyesi ilə onu ömürlük həbsə də göndərmək olar və Avropaya insan haqlarının pozulmasına görə qurbanlıq şousu düzəltmək də. Bir sözlə, qarşıda bizi hələ çox gərgin hadisələr gözləyir. Həyəcanınızı boğun və inanılmaz sürprizlər yaşamağa hazır olun.