Qənimət Zahid
Nəcəf bəy Nəcəfov haqqında çoxlu xatirələrim var və onları indi bölüşmək fikrində deyiləm. Əlbəttə, onun rəhbərlik etdiyi redaksiyada müxbir, şöbə müdiri, redaktor müavini olmuşamsa, daha sonra isə onun yerinə keçərək «Azadlığ»ın redaktoru olmuşamsa, deməli, şəxsi və işgüzar münasibətlərimiz yüksək səviyyədə olub, xatirələrim də çoxdur. Amma böyük şəxsiyyətlər bizimlə birgə var olan xatirə materiallarına görə böyük deyillər ki…
Nəcəf bəy böyük adamdı. Böyük ziyalı idi. Mütəvazi, sakit təbiətli adam idi. Emosional zamanları da olurdu: ciddi bir ədalətsizlik faktı onu özündən çıxara bilərdi, amma tez də «niyə belə olur» sualının sakit cavab axtarışına dönən adam idi.
İndi yeri görünən şəxsiyyətlərdəndir. Hər zaman yeri göynəyən şəxsiyyətlərdəndir və çox təəssüf ki, indi Azərbaycanda bu cür şəxsiyyətləri gündüzün işığında çıraqla axtarmalı oluruq.
Ziyalı qıtlığı var Azərbaycanda. Gerçək ziyalı qıtlığı var. Nəcəf Nəcəfov kimi on nəfər, 20 nəfər, yüz nəfər,.. ziyalı olsa, bilirsizmi, nələr olardı? Cəmiyyətin bir ziyalı təbəqəsi yaranardı və həmin təbəqə sadə, binəsib, çarəsiz azərbaycanlıları yuxarılardan gələn fəlakətlərdən qoruyucu qat olardı. Ozon qatı kimi bir təbəqə! İndi o təbəqə yoxdur və yuxarıdan gələn bütün yaramazlıqlar aşağıların başında çatlayır, evlərini, həyatlarını, ümidlərini darmadağın edir.
Nəcəf Nəcəfov kimi şəxsiyyətləri sadəcə, xatırlamaq azdır, həm də çevrəmizə boylanıb «o yerişi kimlər yeriyə bilər?» sualının cavabını axtarmaq üçün gərəkdir bu anım.
İndi özünü ziyalı sayan, ən azından, özü haqqında ətrafda olanlar üçün bu təəssüratı yaratmağa çalışanlar «mən olmayanda məni də bu cür xatırlayacaqlarmı?» sualına cavab olaraq gərəkdir Nəcəf Nəcəfov kimi şəxsiyyətlərin xatırlanması: «məni də bu cür ansınlar- xatırlasınlar deyə, nələri necə etməliyəm»?
Elə buna görə də, bu cür ildönüm- təqvim günlərində şəxsi xatirələri qabartmağa ehtiyac görmürəm. Nəcəf bəy, axı, hansısa həyat epizodlarından ibarət deyil. O, bütündür, prosesdir, bu cür adamları gözünüzün qarşısında xatirə qırıqları ilə canlandıra bilməzsiz; bu cür adamlar Azərbaycan tarixidir. Elə o cür də vərəqləmək lazımıdr ki, o kitablardan götürə biləcəklərinizi həyatınızın rəngini və ya tərzini deyil, mahiyyətini korrektə etmək üçün faydalana biləsiz.
Bir də sevgiyə baxın! İndi, o, yoxdur, amma onu xatırlayanların yaşatdığı sevgi var. Bu sevgi, Allah bilir, neçənci əsrdən üzü bəri Azərbaycan elitasının bizim üçün yaratdığı qürurun, dik yaşamağın, gözütoxluğun, millət və Vətən təəssübünün aşıladığı nəhəng bir sevgidir.
Nəcəf bəyi Azərbaycan tarixi kimi xatırlayıram. Yəqin, çoxları da elə mənim kimi xatırlayır. Dünyaya gəliş günü mübarək tarixin davamına təminat verən günlərdən daha biridir.