Qənimət Zahid
«Təbib» Azərbaycan karonavirusun yayılması üçün əlindən gələn hər şeyi edir. Ölkənin bu ikinci Səhiyyə Nazirliyi yalnız birinci Səhiyyə Nazirliyini yox, həm də bütövlükdə səhiyyə sistemini sökür, əhalinin sağlamlığı üzərində aparılan eksperimentlərin fəal icraçısı kimi fəaliyyət göstərir.
Bəri başdan deyim ki, Oqtay Şirəliyevi axtarıb eləməyin. Ona tapşırıblar ki, burnunu koronavirus məsələlərinə soxma, bu işlərlə «Təbib» məşğuldur. «Təbib»in başçısı Ramin Bayramov adlı bir gəncdir, bu gənc adam bu zamana qədər işlədiyi bütün sistemlərdən yarıtmazlığına görə rədd edilib. Burası isə bataqlıq olduğuna görə onu ordan rədd etmək çətin olacaq, həm də gec olacaq. Koronavirus eksperimentlər üçün sonsuz imkanlar yaradır və burda günahkar axtarmaq da çətindir. Əgər nəticələr uğurlu olsa, Ramin Bayramovu tərifləyib Səhiyyə naziri qoyacaqlar, uğursuz olsa, Oqtay Şirəliyevi pisləyib Ramin Bayramovu onun yerinə təyin edəcəklər.
Azərbaycanda koronavirus təhlükəsi ilə mübarizənin baş məbədi kimi «Yeni Klinika» adlı müəssisə seçilib. Burda «mübarizə»yə cəlb edilənlərin böyük faizi rezidentlərdir. Yəni, tələbələr. Ki, onların heç bir təcrübəsi yoxdur. Əvvəllər onları «intern» adlandırırdılar, indi rezident deyirlər və bu təcrübədən sonra dövlət imtahanı verib həkimlik diplomu almalıdırlar. Hələ həkim sayılmırlar. Niyə bunları cəlb ediblər ? Çünki, həkimlərə əlavə pul vermək lazımdır, tələbələr isə volontyor kimi cəlb edilirlər, onlara çox da para xərcləməyə ehtiyac olmur. Üstəlik, bu təcrübəsiz və rahat idarə edilən gənclərin adına pul yazıb mənimsəmək də rahat olur.
Bu situasiyanı gərginləşdirmədən qeyd edimm ki, indi həmin mübarizə mərkəzlərinə cəlb edilən rezidentlərin və həkimlərin də əksəriyyəti virusa yoluxublar, buna görə də həkimlər öz aralarında daxili tpvsiyyələr yağdırırlar ki, «Yeni Klinika»ya getməyin, özünüz yoluxa bilərsiz.
İkincisi, həmin o «mübarizə» mərkəzlərində əsl gestapo rejimi yaradılıb. Xidmətə girən və xidmətdən çıxan həkimlər daranıb yoxlanılır, üst- başlarını da soyundurub yoxlayırlar. Guya ki, hansısa dərmanları özləri ilə apara bilərlər: həkimlər bu aşırı yoxlama-darama prosedurlarını özləri üçün təhqir sayırlar və bu da əlavə psixoloji gərginlik yaradır.
«Təbib» koronavirusla bağlı mübarizənin mərkəzi deyil. Orda bu virusla mübarizə aparılmır, buna cəhd edirlər, amma mübarizə əvəzinə uğursuz eksperimentlər aparılır.
Bir mühüm məsələni mütləq bilməlisiz: Azərbaycana koronavirusun ikinci dalğası gəlməyib, bu, elə birinci dalğadır. Birinci dalğada virusla mübarizə üçün heç bir effektiv tədbir görülmədi, bütün tədbirlər də ya yarımçıq, ya da qüsurlu oldu. Əslində, həmin o «birinci» mərhələdə koronavirusla bağlı mübarizə iki istiqamətdə zərərli oldu.
Birinci istiqamətdə İlham və Əliyev və onun siyasi adlandıra biləcəyiniz komandası. Bu komanda koronavirus epidemiyasından nə qədər qazana biləcəyini hesablamaqla məşğul oldu; əhalinin təminatını möhkəmləndirib sərt karantin rejimi almadı; səhiyyə sistemini iki yerə bölüb hərc- mərclik yaratdı və sairə…
İkinci istiqamətdə isə «Təbib» bacardığı əqdər ziyanı vurdu və vurmaqdadır.
Mən koronavirusla mübarizənin daha effektiv şəkildə aparılması üçün təkliflər vermək fikrində deyiləm. Sadəcə, onu demək istəyirəm ki, peşəkar həkimlərin söz və qərar sahibi olaraq cəlb edilməməsi ölkədə dəhşətli bir vəziyyət yaradıb. Virus Azərbaycanda hələ çox fəlakətlər yaradacaq.
İnanmayanlar inanmasın və bu virus onların inamından və inamsızlığından asılı olmayaraq sürətlə yayılır və yayılacaq. Qarşısını almaq mümkün deyil və yaxın zamanlarda mümkün olmayacaq!
«Təbib» İlham Əliyevlə birləşib Azərbaycanı koronavirusa təslim edəcək.
Bunları demək istədim və bunları demək mənim borcum idi.