Milli Şuranın Koordinasiya Mərkəzinin üzvü Gültəkin Hacıbəyli
Hal-hazırda ölkəmizdə sosial fəlakət özünü dörd istiqamətdə daha qabarıq göstərir:
1.Koronavirus korrupsiyası
COVİD-19-un bilavasitə özü. Bu dəhşətli bəla qarşısında bu dərəcədə aciz qalmağımızın səbəbi yarıtmaz, səriştəsiz idarəçilik və korrupsiyadır. 3,8 milyard manat həcmində olan Koronavirus fondunu hakim elita öz otellərinin bir gücəsinə 240 manat pul silməklə, AZAl-a 87 milyon manat, öz banklarına yüz milyonlarla manat pul köçürməklə mənimsədi. Ancaq üç aydır Milli Şura olaraq gcə-gündüz haray salmağımıza baxmayaraq ölkəyə ağciyər ventilyatorları alınmadı. “Bu gün Azərbycanda necə ağciyər ventilyatoru var?” sualının cavabından da məhz buna görə yayınırlar. Ölkədə cəmi 6 ədəd olan ECMO aparatını isə 6 milyon avroya , yəni öz qiymətindən (150 min avro) 40 dəfə! baha qiymətə “alıblarmış”. Yəni, 36 milyon avroya 240 aparat əvəzinə cəmi 6 aparat alınıb. Koronavirus korrupsiyanın qorxunc miqyasını bundan daha yaxşı izah etmək mümkün deyil. Xəstəxanalar dolub, insanlar günlərlə təcili tibbi yardım çağıra bilmirlər, xəstəxanaya yerləşdirilmirlər. Xəstəxanalara yerləşdirilmənin pulla və tapşırıq əsasında gerçəkləşdirilməsinə dair bir neçə konkret nümunəni dostlarımdan şəxsən eşitmişəm.
- Öldürən səhiyyə
Azərbaycanda səhiyyə sistemi yoxdur, məhv olub, darmadağın edilib, korrupsiyanın yeminə çevrilib. On ildən çoxdur ki, ölkə səhiyyəsindən əlini üzmüş milyonlarla insan şəfa ardınca İrana, Türkiyəyə pənah aparır, orada müalicə olunur. İndi karantinə görə yollar bağlı olduğundan həmin insanlar da kütləvi şəkildə məhv olmağa başlayıblar. Mən davamlı şəkildə bir neçə aydan bir Türkiyəyə və İrana gedib müalicə alan neçə insanın bu müddət ərzində müalicəsizlikdən həyatla vidalaşdığına özüm şahidəm.
- İşsizlik və aclıq
Ölkəmizin üzərinə qar uçqunu kimi, sel kimi, tufan kimi gələn qorxunc bəlalardan biri, bəlkə də birincisi aclıqdır. Karantinə görə işini itirən, elə karantindən öncə də işsiz olan vətəndaşlarımızın sayı 3 milyon civarındadır. Bu insanların böyük əksəriyyəti günəmuzdçuluqla ailəsinə gündəlik 15-20 manat çörək pulu aparanlardır. Aydındır ki, aztəminatlılar kateqoriyasına daxil olan bu təbəqənin yığım imkanları və ehtiyatı olmayıb. Bu insanlar acdırlar və dövlət onları və övladlarını aclıqla üz-üzə buraxıb. İnsan acdırsa, övladına çörək verə bilmirsə, onun üçün COVİD-19-dan, yoxsa aclıqdan həyatını itirmək arasında elə böyük fərq olmayacaq. Normal qidalana bilməyən insanların immunitetinin zəifləməsi isə virusun yayılması və müqavimətsiz bir şəkildə ağciyərləri məhv etməsi üçün çox əlverişli şərait yaradır.
- Susuzluq.
Heç bir vaksini və müalicəsi olmayan amansız xəstəliyə müqavimət göstərməyin ən praktik və düzgün yolu gigiyena qaydalarına aşırı diqqət yetirmək, əlləri tez-tez sabunla yumaq, spirtlə dezinfeksiya etməkdir. Su isə ona bu qədər acil və təxirəsalınmaz ehtiyac olan vaxtda qəhətə çıxıb. Çünki həmin su ilə ölkənin böyüklərinin min hektarlarla əkin sahəsi suvarılmalıdır. Bədbəxt azərbaycanlılar isə əllərini yumasa da, virusa yoluxsa da, lap elə kütləvi şəkildə qırılsa da nə qəm! Onsuz da bu qədər insanı dolandırmaq çətin idi və neft avtoritarlara xəyanət edəndən sonra daha da çətinləşib…