Hakim hökm oxumağa tələsdiyindən prosedur qaydalara əməl etməyi unutdu
Təzəxan Mirələmli
(İki gün əvvəl yazdıqlarımın davamı)
21.05.2020-ci il tarixə hazırlıq iclasının təyin edilməsi ilə bağlı bildiriş alıb, məhkəməyə gedirəm.
Elə ilk gündən “zərərçəkmiş şəxs” şantaj yolunu tutur, məhkəməyə aidiyyatı olmayan şəxslərin adını çəkməklə məni münaqişəyə cəlb etmək istəyir. Mən reaksiya vermədikdə isə təhqirlərə yol verir.
İttiham aktını almadığım üçün məhkəmə iclasının təxirə salınmasını istəyirəm. “Zərrəçəkmiş şəxs” isə təkidlə mənim həbsimi tələb edir. Yalnız bir gün vaxt verilir. 22.05.2020-ci il tarixdə keçirilən iclasda cinayət işinə xitam verilməsi, əlavə şahidlərin dindirilməsi, bəzi sübutların iş materiallarına əlavə edilməsi barədə vəsatət verirəm. İşə xitam verilməsi barədə vəsatət müzakirə olunur. Vəsatəti yazılı surətdə təqdim edirəm. Vəsatətdə aşağıdakılar qeyd olunur və bu səbəblərə görə cinayət işinə xitam verilməsi xahiş olunur. “Cinayət işinin materiallarında tərəfimdən cinayət əməlinin törədilməsini təsdiqləyən və ya təqsirliliyini sübuta yetirən hər hansı mötəbər sübut növü mövcud deyildir. İstintaqa təqdim olunan yeganə sübut növü hesab olunan videogörüntüdür. Həmin görüntülərin mənbəyi göstərilməyib. Ekspertiza rəyi ilə həqiqqiliyi yoxlanılmayıb. Həmin videogörüntülərə tam baxdıqda Abdullayev Ata Eldar oğlunun özünün əməlində cinayət tərkibinin olması daha aydın görünür. Onun əməli ictimai qaydanı kobud surətdə pozan, cəmiyyətə açıqca hörmətsizlik edən qərəzli hərəkətlərdən ibarətdir.
İstintaq orqanı yalnız iki şahidin-İsmayılov Vədad Hüseyn oğlu və Borcəliyev Rəşad Babək oğlunun, ifadələri ilə kifayətlənmişdir. Hər iki şəxs Ata Abdullayevə yaxın şəxslərdir. Onlardan biri onun kameramanıdır.
İstintaq orqanı araşdırma aparmaq üçün ifadəmdə adı çəkilən şəxslərin şahid kimi dindirilməsini təmin etməyib (Cinayət işinə xitam verilməyəcəyi təqdirdə əlavə şahidlərin dindirilməsi barədə də vəsatətim olacaq).
Mənim, Ata Abdullayevə hər hansı xəsarət yetirməyimin sübutu yoxdur. Ata Abdullayev həmin günkü və sonrakı publik açıqlamalarında mənim onu vurmağım barədə heç bir ifadə işlətməyib, sadəcə ona yumruq atdığımı dəfələrlə qeyd edib (hazırkı vəsatətim təmin olunmayacağı halda həmin publik çıxışların görüntüləri məhkəməyə təqdim olunacaq).
İş materiallarında olan Səhiyyə Nazirliyinin Məhkəmə Tibbi Ekspertiza və Patoloji Anatomiya Elmi-Təcrübi və Tədris Birliyinin Xətai Rayon Şöbəsinin 29 fevral 2020-ci il tarixli 246-saylı rəyində göstərilən “çənə nahiyəsinin sıyrığı və qanşırı xəsarəti”nin müəyyən edilməsinin də sübutu yoxdur. Bu barədə iş materiallarına hər hansı fotoşəkil əlavə edilməyib. Abdullayev Ata öz canlı yayımını davam etdirən zaman ona hər hansı xəsarət yetirilməsi barədə bildirməyib.
Yəni, mənim əməlimdə AR CM-nin 221-ci maddəsinin tərkibi mövcud deyildir, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, vətəndaşlar üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər və onun tövsifedici əlamətləri olmayıb. Ata Abdullayevə hər hansı xəsarət yetrilməsi və ümumiyyətlə ictimai qaydanı pozmamı təsdiq edən hər hansı sübut növü yoxdur. Belə olan halda isə zərərçəkmiş şəxsin və ona yaxın şahidlərin ifadələri mötəbər sayıla və ittihamın düzgün və ədalətli həlli məqsədilə istifadə edilə bilməzdi.
İstintaq orqanı məni qanunsuz və əsassız, sifarişli cinayət məsuliyyətinə cəlb etməklə, mənim həm də müxalif siyasi partiya olan AXCP-nin fəal üzvü olduğuma görə cəzalandırmaq məqsədi güdmüşdür”. Bu vəsatət hazırlıq iclasında müzakirə olunmalı idi. Tərəflərin mövqeyi öyrəndikdən sonra hakim qısa müşüvirəyə gedib, vəsatət təmin etmir , hazırlıq iclası keçirilir. Məhkəmə baxışı 04.06.2020-ci il tarixə təyin olunur.
Dövlət ittihamçısı ittihamı elan edir. Özümü təqsirli bilmədiyimə görə ifadə vermirəm, buna görə də məhkəmə “zərərçəkmiş” şəxsin və ittiham tərəfinin şahidlərinin çıxışları ilə davam edir. Həm “zərərçəkmiş”ə həm də, onun təqdim etdiyi iki şahidə verilən suallar zamanı ziddiyətlər yaranır. Şahidlərə verilən sualdan aydın olur ki, mənim hər hansı təhqir və söyüş işlətməyimi eşitməyiblər. Zərərçəkmişə xəsarət yetirməyim barədə də bir birinə zidd cavablar alınır. Buna görə də ekspertin əlavə şahid qismində dindirilməsi barədə vəsatət verirəm. “İş materiallarında olan Səhiyyə Nazirliyinin Məhkəmə Tibbi Ekspertiza və Patoloji Anatomiya Elmi-Təcrübi və Tədris Birliyinin Xətai Rayon Şöbəsinin 29 fevral 2020-ci il tarixli 246-saylı rəyində göstərilən “çənə nahiyəsinin sıyrığı və qanşırı xəsarəti”nin müəyyən edilməsinin də sübutu yoxdur. Bu barədə iş materiallarına hər hansı fotoşəkil əlavə edilməyib” bu səbəbdən ekspert rəyini verən ekspertin məhkəməyə dəvət edilib dindirilməsini xahiş edirəm. Bu vəsatət də təmin olunmur. Növbəti proses 18.06.2020-ci il tarixə təqdim olunur.
Növbəti proses günü sərbəst ifadəmi verirəm. Əməlimdə cinayət tərlkibinin olmadığı üçün özümü təqsirli bilmədiyimi elan edirəm. Həmin hadisə zamanı xuliqanlıq əməlinin tərkib hissəsi olubsa da o “zərərçəkmiş” şəxsin özü tərəfindən həyata keçirilməsini qeyd etməklə, məhkəməyə təqdim etdiyim sübutları bir daha xatırladıram.
Hakim məhkəmə istintaqının başa çatmasını elan edir. Mən etiraz edib, hazırlıq iclasında təqdim edilmiş vəsatətlərə münasibət bildirilməsini xahiş edirəm. Əlavə şahidlərin dindirilməsi ilə bağlı vəsatətim qismən təmin edilir, təqdim etdiyim 5 nəfər şahiddən bir nəfəri dindirilir, “zərərçəkmiş” şəxs həmin şahid xanımı və bütün AXCP-çi qadınları təhqir edir, hakim Fərid Yaqubovun isə heç bir irad bildirməyə cəsarəti çatmır.
Hazırlıq iclasıında təqdim etdiyim digər vəsatəti də xatırladıram həmin vəsatətin təmin olunmasını xahiş edirəm. Vəsatət: “Azərbaycan respublikası Cinayət Prosesual Məcəlləsinin 125.1-ci maddəsinə əsasən Məlumatların, sənədlərin və digər əşyaların həqiqiliyinə, yaranma mənbəyinə və əldə edilməsi hallarına şübhələr olmadıqda onlar sübut kimi qəbul edilə bilərlər.
İcraatınızda olan cinayət işi ilə bağlı zərərçəkmiş şəxs-Ata Abdullayev tərəfindənistintaq orqanına bir sübut- videogörüntü təqdim olunub. Amma həmin videomaterialın mənbəyi göstərilməyib. 26.02.2020-ci il tarixdə baş vermiş hadisə ilə bağlı müxtəlif informasiya vasitələrində materilallar var. Onlardan biri ANEWS TV saytında yayımlanıb. Həmin materialdan görünür ki, insidentin başlanılmasının səbəkarı Ata Abdullayev olmuşdur. Həmin ərazidə xeyli sayda yüksək rütbəli və sıravi polis əməkdaşları olub. Həmin an mənim əməlimdə cinayət tərkibi olsa idi, bu zaman ilk olaraq polis əməkdaşları reaksiya verərdi.
Ata Abdullayev 19.04.2020-ci il tarixdə öz videoçıxışında mənim barəmdə qaldırılan cinayət işinin məhkəmə baxışı zamanı başqa məqsədlər üçün nəzərdə tutulduğunu açıq –aydın bildirib. Həmçinin, 21.05.2020-ci il tarixə təyin olunmuş hazırlıq iclası öncəsi və ondan sonrakı açıqlamalarında da, mənim barəmdə hökm çıxarılmasının konvensiyadan kənar məqsədlər üçün istifadə olunmasını dilə gətirir”. Bu vəsatət də təmin olunmur.
Məhkəmə bununla istintaqın bitdiyini elan edərək, birbaşa çıxışlar mərhələsinə keçdi. Hakim elə tələsirdi ki, hətta iş materiallarında olan sənədləri elan etmədi. Zatən orada tətqiq olunmalı bir sənəd də yox idi, ekspertiza rəyi ilə bağlı çatışmazlıqlar üzə çıxacaqdı. Zərərçəkənin özünün təqdim etdiyi video görüntüdə nə onu vurmağımı, nə də hər hansı xəsarətin olmasını sübuta yetirəcək hal olmadığından hakim onların üzərindən keçməli oldu. Amma buna baxmayaraq məhkəmə prosedur ardıcıllığa riayət etməli idi.
Dövlət ittihamçısı isə ittihamın sübuta yetdiyini deyərək mənim bir il müddətinə azadlığın məhdudlaşdırılması cəzasına məhkum olunmağımı istədi. Müdafiə tərəfinə söz verib hökmü oxumağa tələsirdi. Mən əsas vəkilimin iştirak etmədiyini bildirərək vaxt istədim. Məhkəmə prosesi 25.06.2020-ci il tarixə təxirə salındı.
26.06.2020-ci il tarixdə səhər saatlarında məhkəmə iclas katibi zəng edim karantin rejiminin tətbiqi ilə əlaqədar işi yekunlaşdırmaq istədiklərini bildirdi və məhkəməyə gəlməyimi dedi. Bu zaman Rüfət Səfərovun məhkəməsi yadıma düşdü, ona da vəkilin çıxışı, son söz olmadan hökm oxunmuşdu. Çox təkid etdiyi üçün saat 17-yə məhkəmə iclasının salınması ilə razılaşdıq.
Yenə “zərərçəkmiş şəxs” məhkəmə önçəsi öz ampluasında idi. Hətta məhkəməni şantaj etməkdən çəkinmirdi. Guya mən hamıya bildirmişəm ki, azadlığın məhdudlaşdırılması cəzasını xahiş-minnətlə almışam. Bunun üçün ATƏT-dən, AŞPA-dan belə xahişlər etmişəm.
Vəkilim Bəhruz Bayramov cinayət işində 221-ci maddənin tərkib hissəsinin olmamasını, işə bəraətverici əsaslarla xitam verilməsini istədi. Dövlət hesabına təyin edilmiş vəkilim Sara Əliyeva da həmkarı ilə həmfikir olduğunu bildirdi.
Mən son sözümdə, işə xitam verilməsi ilə bağlı vəkillərimlə razı olduğumu bildirərək. Əslində mənim məhkum edilməyimin əsas səbəbi kimi yazının əvəlindən qeyd etdiyim faktlar idi. Qeyd etdim ki, bu cəza bir-başa mənim peşə fəaliyyətimlə bağlıdır və ifadə azadlığımın məhdudlaşdırmasına yönəlib. Məhkəmənin nəzərinə onu da çatdırıram ki, mənə nəzərdə tutulan cəzaların içərisində 4 cəza növü var: 1000 manatdan 3000 manata kimi cərimə, bir ilə qədər islah işləri, bir ilə qədər azadlığın məhdudlaşdırılması və bir ilə qədər azadlıqdan mərhumetmə. İlk iki cəza növü məhkumların müəyyən məbləğ ödəməsi ilə, son iki cəza növü isə dövlət hesabına vəsaitin ödənilməsi bahasına başa gəlir. Onu da qeyd edirəm ki, niyə görə məhz azadlığın məhdudlaşdırılması cəzası təyin edilir. Ona görə həbslə bağlı cəza 1 ilə qədər nəzərdə tutulsa da, faktiki ümumi cəzanın dördə üçündən artıq verilə bilməz, 9 ay özü də çox sayıla bilir, ona görə ki, həmin maddə ilə adətən həbslə bağlı cəzalar 5-6 ay olur. Məni daha çox nəzarətdə saxlamaq üçün hakimiyyət üçün ən məqbul variant məhz azadlığın məhdudlaşdırılması idi. Buna görə də prokurorun istəyini hakim canla-başşla yerinə yetirdi.
Protokollarla tanış olmaq və qeydlərimi etmək üçün 23.06.2020-ci il tarixdə Xətai rayon məhkəməsinə getdim. Lakin şərait yaradılmadı. Bildirdilər ki, yazılı müraciət etməliyəm, yazılı müraciət edəndə isə poçtla göndər dedilər. Buna baxmayaraq, müraciətimi poçtla göndərdim. Hökmü isə poçtla mənə göndərdiklərini bildirdilər. Hökmü alan kimi, apellyasiya məhkəməsinə şikayət göndərəcəyəm….