Səmimiyyətin qarşılığı təhqirdirmi?
İlham Hüseyn
Xeyli adam ümidlənmişdi. Xeyli adam müharibədən sonra fərqli əhval-ruhiyyə, fərqli idarəçilik, fərqli siyasi leksikon gözləyirdi. Əslində haqlı gözlənti, məntiqli ümidlənməydi. Çünki uzun illərdən sonra milli birlik yaranmış, ordumuz zəfərlərə imza atmış, torpaqlarımızın xeyli hissəsi azad olunmuşdu. Bütün çatışmazlıqlarına, neqativ addımlarına baxmayaraq, hökumətin reytinqi artmış, cəmiyyətin yaddaşı yeni səhifəyə hamilə qalmışdı.
Normal düşüncə qabiliyyətinə malik olan istənilən hökumət bu vəziyyəti bəxətəvərçilik kimi qiymətləndirər, bu şansdan bəhrlənərdi. Rahatlıqla iqtisadi- siyasi islahatlara start verməli, siyasi məhbus məsələsin kökündən həll etməli, daxili və xarici siyasətdə yeni cığırlar açmalıydılar. Yəni, indiki situasiya keçmişdəki eybəcər tablonu məhv edib, yeni portret yaratmağı diktə edirdi.
Söhbət eramızdan əvvəldən getmir axı. Ən yaxın tarixdən danışırıq və hər bir vətəndaş gördü ki, savaş dönəmində müxalifət iqtidarla xor oxudu, ordunun zəfərin sevinc göz yaşlarıyla qarşıladı, xaricdən gələn təzyiqlərə adekvat reaksiya verdi, tənqidləri durdurdu. Hətta müharibədən sonra da eyni mövqe sərgiləndi, milli birliyin qorunmasının vacibliyi əsas xətt oldu.
Tənqidlər isə şəhid ailələrinə, qazilərə diqqət və qayğı tələb etməkdən ibarət oldu. Yəni, müharibədən sonra müxalifət mitinq, seçki tələb etmədi, müharibə qəhrəmanlarına adekvat münasibət tələb etdi. Amma çox qəribə bir reallıqla üz-üzə qaldıq. Hökumətin trolları daha aqressiv oldu, keçmişin çirkin ənənəsi daha çirkin şəkildə təzahür etdi və ölkə başçısı son müşavirədə son nöqtəni qoydu. Hətta ən kəskin tənqidlərin meydan suladığı vaxtlarda da, belə ağır təhqirlər eşidilməmişdi. Sanki, şəhid və qazilərə diqqət tələb etmək vətənə xəyanətdi. Sanki, düşmənə yardım edən Rusiya “sülhməramlı” larına etiraz etmək dövlət qarşı cinayətdi. İqtidarın etməli olduğun müxalifət edir. İqtidarın deməli olduğun müxalifət deyir. Müharibə dövründə və sonrakı mərhələdə sərgilənən səmimi mövqeyin, səmimi dəstəyin qarşılığı təhqir olmalıydı? İndiki həssas dövrdə bütün problemləri görməzdən gəlib, 27 il əvvəlki hakimiyyəti lənətləmək, indiki müxalifəti “anti-milli” adlandırmaq vətənə xidmətdi? Bu ritorika dövlət maraqlarının tələbidi?
Müxalifət dili qarnına qoyanda, iqtisadçılar həqiqəti “banlamayanda” problemlər həll olacaq? Müharibənin sonlarına yaxın “hətta radikal müxalifət də yüksək şüur nümayiş etdirdi” deyən prezident, niyə indi bu şüur göstəricilərin xəyanətkar adlandırır?
Əlbəttə, səbəbləri daha geniş və çalarlı təqdim etmək olar. Amma qısası budur ki, qarşıdakı dövrdə daha ağır sosial-iqtisadi vəziyyət bizi gözləyir. Ötən ilin müvafiq dövrüylə müqayisələr apardıqda iqtisadi göstəricələrin rəqəmlərin diliylə “şaxsey-vaxsey” etdiyi də aydın görünür. Eyni zamanda bu il Rusiyanın erməni sevgisi daha qabarıq şəkildə özün göstərəcək, məlum sənədin təpiklənməsi davam edəcək, Qarabağdakı real vəziyyət daha çılpaq təqdim olunacaq.
Təbii ki, bütün bunlara vətənin, dövlətin, xalqın sevən adamlar susmayacaq, hökumətdən izahat tələb edəcək, xalqa həqiqətləri çatdıracaq. Bu isə həmişəki kimi hökumətin xoşuna gəlməyəcək. Ona görə də indidən gözdənsalma kampaniyasına start verilib və diqqəti əsas mövzudan yayındırmağa çalışırlar.
Amma bir daha təkrar edirik ki, bu formada siyasət yürütmək, idarəçiliyi bu qəlibə salmaq dövləti zəiflədir, xarici siyasəti iflic edir, daxili birliyi zədələyir. Rəqiblərlə təhqir dilində danışmaq yox, idarəçiliyin “ana dili”n öyrənmək lazımdı. Dövlətin fəlsəfəsi, Konstitusiyanın tələbi, siyasətin əlifbası bu deyil. Elə şeylər var ki, o şeyləri şəxslərin özünə yaraşdırması, xalqı aşağılayır, dövlətin imicin ləkələyir. Namərd düşmənçilik, mərd rəqabətdə məğlubiyyətin etiraf olunmasıdı. Söyməklə sevilmək, şərləməklə hörmətli olmaq mümkün deyil. Qorxunun yaşatdığı adamlar, sevginin yaşatdığı adamlara sonda məğlub olur.
Bir də düşünmək lazımdı.