AXCP Rəyasət Heyətinin üzvü Fuad Qəhrəmanlı
ATƏT Minski Qrupunun Dağlıq Qarabağla bağlı nizama salma prosesindən kənarlaşdırılması, diplomatik baxımdan doğru deyildi. Bu Rusiyaya təktərəfli qaydada Qarabağ problemi üzərində hərbi siyasi nəzarəti ələ almağa və hər hansı beynəlxalq razılaşma gözləmədən, öz hegemonluğunu həyata keçirməyə imkan yaratdı.
Deyilə bilər ki, bəs onsuz da ATƏT Minski Qrupu həmsədrlərinin fəaliyyəti heç bir nəticə vermirdi.Doğrudur, ancaq nəzərə almaq gərəkdir ki, hazırkı situasiyada, bu diplomatik formatın mövcudluğu Dağlıq Qarabağ problemini həll etmək üçün yox, Rusiyanın təktərəfli qaydada Qarabağ məsələsində söz sahibi olub Azərbaycanın suverenliyini tapdamasının qarşısını almaq üçün lazımdır. Ona görə də Azərbaycan iqtidarı təcili olaraq öz səhvini düzəldib, Rusiyanın problemi lokallaşdırmaq cəhdlərinə qarşı beynəlxalq nizama salma formatına geri dönməlidir.
Bu indiki halda Azərbaycana nə verə bilər?
- Baydenin Rusiyaya münasibətini nəzərə alsaq, bu format Azərbaycana ABŞ – vasitəsi ilə Rusiyanın sərbəstliyini məhdudlaşdırmaq, hegemon iddialarına qarşı əks güc qoymaq imkanı verəcək.
- Azərbaycan Qarabağdakı sülhməramlı missiyanın tərkibini Rusiyanın monopoliyasından çıxarıb, beynəlxalq formata keçmək üçün ATƏT Minski Qrupundan diplomatik platforma kimi istifadə edə bilər.
- Bu formatda Azərbaycan 3 tərəfli bəyanatda əksini tapdığı kimi, qaçqınların Dağlıq Qarabağa qaytarılması üçün BMT Qaçqınlar üzrə Ali Komissarlığını prosesə cəlb edə bilər. Bu yolla da Rusiyanın kənardan şirnikləndirmə yolu ilə Dağlıq Qarabağa erməni daşıyıb gətirməsi və burada süni surətdə say artırmasının qarşısı alınmış olar.
Rusiya bu gün Dağlıq Qarabağda Azərbaycanın suverenliyini pozan, separatçı rejimi hərbi – siyasi baxımdan dəstəkləyən elə addımlar atır ki, bunun müqabilində Azərbaycan iqtidarının durub “ərazi bütövlüyümüz bərpa olundu” , “daha Qarabağ problemi yoxdur” kimi tezislər səsləndirməsi cəmiyyətdə əks təsir doğurur və inandırıcı qəbul edilmir.
Hakimiyyət onu da nəzərə almalıdır ki, Rusiyanın Dağlıq Qarabağda etdiyi özbaşınalıqların faturası, bu hərəkətlərə susqun qalan iqtidarın özünə kəsilir. Hakimiyyət bilməlidir ki, Qarabağda rusların özbaşınalıqlarının qarşısını almaq üçün addımlar atmayacaqsa, 44 günlük müharibənin uğurlarının gətirdiyi siyasi dividentlər də itrməyə başlayacaq.
Ona görə də ATƏT Minsk Qrupu çərçivəsində yeni şəraitə uyğun tənzimləmə layihəsi təqdim edib yeni müzakirələrə başlamaq gərəkdir.