Milli Şuranın sədri Cəmil Həsənli
Azərbaycan Milli Məclisinin deputatı İmamverdi İsmayılov bəyan edib ki, “Heydər Əliyevə Peyğəmbər demək azdır. O, Allahdır! ” Əgər Heydər Əliyev allahdırsa, onda gərək imamverdi də İmamverdi yox, Yezidverdi olsun. Vaxtıyla “Əzrayıl” adında bir povest yazmağından belə məlum olur ki, Heydər Əliyevə Allah titulunun verilməsini əlaqədə olduğu mələklər vasitəsi ilə yer üzünə çatdırıb. Adam Azərbaycanda şaxələndirilmiş yaraınmağın poetik obrazlarından birinə çevrilib. Doğrusu, bəhrəsini də görür. Hər beş ildən bir seçki öncəsi “Azərbaycan” qəzetində İlham Əliyev haqqında “qanadlı” bir yazı yazmaqla deputat mandatın təmin edir. İndi o, bu istiqamətdə əsl novatordur. Yerə endirdiyi Allah, Mərhəmət mələyi və “Müqəddəs ruhun” Müzəffər övladı haqqında elə sözlər, elə qanadlı ifadələr tapır ki, peşə həmkarları ona həsəd aparır.
Sözüm onda deyil. Müsəlman etiqadlı bir ölkənin dövlət orqanında, parlamentində təmsil olunan bir adam küfr danışıb. İşi İslam dinini təqib etməkdən ibarət olan keçmiş KQB sədrini, ömrü boyu ateizmə xidmət etmiş Azərbaycan KP MK-nın birinci katibini, dinsiz Politbüro üzvünü Allah elan edib. Və ölkənin din adamları, Şeyxülislamı, Müftisi, klassik və kreativ üləmaları, 10-15 dəfə Məkkə “ziyarətinə” gedib Beytül Həqqə “qovuşmuş” hacıları, Kərbəla aşiqləri, Məşhəd pərvanələri də qulaqlarını bağlayıb özlərini eşitməməzliyə vururlar.
Bu İmamverdi boyca uzun bir adamdır, amma böyca özündən balaca və vəzifəcə özündən böyük birilərini görəndə böynunu və belini bükür ki, ondan hündür görsənməsin. Bir dəfə Məclisdə hökumətin hesabatı vaxtı boynun bükərək balaca boylu bir nazirlə sohbət edirdi. Yanımdan keçəndə dedim ki, İmamverdi Allah sənə bu cür qamət verib, niyə onu düz saxlamırsan? Dedi ki, Allah bu qaməti verib e, amma onu düz saxlamağa cəsarət verməyib.