AXCP Rəyasət Heyətinin üzvü Aqil Əli Məhərrəmin məhkəməsi yenə qeyri-müyyən vaxta təxirə salınıb. CM-də baş verən dəyişikliyə, qanunların humanistləşdirilməsi qərarına görə o, çoxdan azadlığa buraxılmalıydı. Amma sifariş icra edənlər onu azadlığa buraxa bilmirlər. Ona görə də məhkəmənin vaxtını da təyin edə bilmirlər.
Bildiyiniz kimi, dekabrın 29-da Xəzər Rayon Məhkəməsində Aqil Məhərrəmin cəzasının qanunvericilikdəki dəyişikliyə uyğunlaşdırılıb azaldılması üçün verilən ərizəsinə baxılmışdı. Hakim Tərlan Əkbərovun sədrliyilə keçirilən məhkəmə iclasına A.Məhərrəmli saxlandığı 2 saylı CÇM-dən internet vasitəsilə qatılmışdı. O bildirmişdi ki, CM-nin 192 (qanunsuz sahibkarlıq) və 193-1 (cinayət yolu ilə əldə edilmiş pulları leqallaşdırma) maddələrilə ona verilən ittihamlar əsassızdır. Cinayət törətmədiyi halda cəza aldığını vurğulayan A.Məhərrəmin sözlərinə görə, o, sadəcə, siyasi məhbus ailələrinə yardım məqsədilə göndərilmiş vəsaiti çatdırıb. Cəbhəçi fəal heç olmasa, qanunvericiliyin yumşaldılması nəticəsində yaranan imkanın ona da tətbiq olunmasını istəyib: “Mənə göndərilib, mən də çatdırmışam. Mən o puldan bir manat da gəlir əldə etməmişəm.”