Hakimiyyətin son hücumları ilə bağlı partiyanın bəyanatı
Hakimiyyət Azərbaycan Xalq Cəbhəsi Partiyasını yenidən hədəfə alıb. Ölkə başçısı İlham Əliyev bir neçə gün qabaq ötən ilin yekunlarına dair keçirdiyi müşavirədə Xalq Cəbhəsinə və onun təmsil olunduğu Milli Şuraya qarşı növbəti dəfə nifrət çıxışı edib, əsassız ittihamlar səsləndirib. Bundan sonra partiya funksionerlərini uydurma cinayət işləri üzrə istintaqa çağırmağa başlayıblar (hələlik Gənclər Komitəsinin sədri Emil Səlimovu və partiya sədrinin ictimai əsaslarla mühafizəçisi Ruslan Əmirovu).
Bu arada Azadlıq Radiosu AXCP sədri Əli Kərimliyə qarşı yeni cinayət işinə başlanıldığı, onun “külli miqdarda vergidən yayınma” ittihamı ilə araşdırıldığı barədə xəbər yayıb. Bir gün sonra Baş Prokurorluq xəbəri təkzib etsə də, Azərbaycan reallıqları belə sürpriz hadisələrin istənilən vaxt baş verə biləcəyini istisna etmir.
Bunlardan başqa partiyanın siyasi məhbuslarından üçü – Rəyasət Heyətinin üzvü Aqil Məhərrəmli, sədrin ictimai əsaslarla mühafizəçisi Niyaməddin Əhmədov və Salyan rayon şöbəsinin fəalı Zamin Salayev qərəzli münasibət və pis rəftara məruz qalıblar. Aqil Məhərrəmli ittiham olunduğu maddənin rəsmi sanksiyasının qanunvericiliklə yüngülləşdirildiyini əsas götürərək, cəzasının azaldılması üçün məhkəməyə müraciət edib, lakin məhkəmə işə qərəzli yanaşaraq, müraciəti təmin etməyib. Niyaməddin Əhmədov artıq 9 aya yaxındır həbsdə saxlanılsa da, onun öz ailə üzvlərilə bircə dəfə də olsun, telofonla danışmasına və ya görüşməsinə imkan verilməyib. Zamin Salayev isə cəzaçəkmə müəssisəsində öz haqqını tələb etdiyi üçün cərimə kamerasına (“karsa”) salınıb.
AXCP bildirir ki, ona qarşı budəfəki aqressiyanın səbəbi Vətən müharibəsindən sonra dövlətin və xalqın maraqlarının müdafiəsi istiqamətində tutduğu prinsipial mövqedir. AXCP Rusiya qoşunlarının “sülhməramlı” adı altında olsa da, Azərbaycana gətirilməsinə ilk saatlardan etirazını bildirib, həmin “sülhməramlı” qüvvənin Qarabağda öz səlahiyyətlərindən kənara çıxmasını, qardaş Türkiyənin Qarabağla bağlı proseslərdən kənarda saxlanılmasını daim ictimai diqqətə gətirib və bunlara etiraz edib, şəhid ailələri, qazi və veteranların, eləcə də bütövlükdə əhalinin sosial müdafiə məsələlərini gündəmdə saxlayıb, hökumətin onlara qarşı etinasızlığını tənqid edib.
AXCP təəssüflə vurğulayır ki, Azərbaycan hakimiyyəti cəmiyyətin gözləntilərinin əksinə olaraq, Vətən müharibəsindən sonra da ölkənin həqiqi müxalif kəsiminə qarşı əvvəlki aqressiv və repressiv münasibətini davam etdirmək yolu tutub. AXCP bu yolun dövlətimiz, millətimiz və elə hakimiyyətin özü üçün də yaxşi heç nə vəd etmədiyini bir daha təkrarlayır. AXCP həmişə xalqın və dövlətin mənafelərini hər şeydən üstün tutub və bundan sonra da belə edəcək. Heç bir təzyiq və təhdid onu bu prinsipindən geri çəkilməyə məcbur edə bilməyib, bilməyəcək də. AXCP Azərbaycanın azad və firavan bir ölkə olması uğrunda fəaliyyətini bundan sonra da müttəfiqi Milli Şura və ölkənin bütün mütərəqqi qüvvələri ilə birlikdə, eyni tərzdə davam etdirəcək, özünün dinc və demokratik mübarizəsindən qətiyyən geri çəkilməyəcək. Azərbaycan hakimiyyəti isə qanunlara və hüquqa, üzərinə götürdüyü beynəlxalq öhdəliklərə əməl etməli olduğunu unutmamalıdır.