Nəsimi Məmmədli
Ölkəmizdə və çağdaş dünyada elmi ictimaiyyətin görkəmli nümayəndələrindən sayılan tarixçi-professor, ictimai-siyasi xadim, Milli Şuranın sədri dəyərli Cəmil Həsənlinin bu gün doğum günüdür. Cəmiyyətimizin siyasət, elm-təhsil, hüquq, media, mədəniyyət, incəsənət və digər sahələrin dəyərli insanları arasında onun adının daim rəğbətlə çəkildiyinin şahidiyəm.
Onu 1989-cu ildə BDU tələbələrinin ən çox rəğbət bəslədiyi savadlı, əqidəli, dürüst və mübariz müəllimlərdən biri kimi tanımışam. Cəmil müəllim təkcə onlarla elmi kitabın və yüzlərlə elmi məqalənin müəllifi olan böyük alim deyil, o, həm də samballı ictimai-siyasi xadim, çox sadə, səmimi, mehriban və təvazökar insandır.
Cəmil müəllimlə ünsiyyətdə olanda zamanın necə sürətlə keçdiyini hiss etmirsən. Sanki dünya və Azərbaycan milli ensiklopediyasının ən maraqlı səhifələrini canlı vərəqləyirsən. Cəmil müəllim ölkəmizin elə öndər şəxsiyyətlərindəndir ki, bilgilərini xəsislik etmədən paylaşmağa, hər kəsə təmənnasız öyrətməyə çalışan, habelə, tələbələrinə, silahdaşlarına, sadə insanlara qarşı səmimi və mehriban olduğu qədər də, haqsızlığa, ədalətsizliyə, qanunsuzluğa qarşı sərtliyi, barışmazlığı, cəsarətli və prinsipiallığı ilə seçilir.
Xatırladım ki, vaxtilə keçmiş sovet respublikalarının aparıcı universitetlərində çalışan onlarla tarixçi alim dünya miqyasında tanınsa da, onlardan heç birinə dünyanın ən nüfuzlu universitetlərindən sayılan ABŞ-ın Harvard Universitetində nəşr olunmaq nəsib olmayıb. Ancaq Cəmil müəllim keçmiş sovet ittifaqından olan yeganə tarixçi alimdir ki onun Harvardda 2 kitabı nəşr olunub. “At the Dawn of the Cold War: The Soviet-American Crisis over Iranian Azerbaijan, 1941-1946” və “Stalin and the Turkish Crisis of the Cold War, 1945-1953” kitabları dünya elm-tarix kitabxanalarının nəhəng tədqiqat əsərlərindəndir. Bundan əlavə onun “The University of Utah Press” də yeni nəşr olunan kitabı da dünya alimləri tərəfindən eyni maraqla qarşılanıb.
Həmçinin, hazırda Rusiyanın ən böyük nəşriyyatlarından biri olan “Издательство «Политическая энциклопедия» – РОССПЭН” onun yeni “После Сталина” kitabını nəşr edib. Bu monoqrafiya Sovet Azərbaycanının 60-cı illərindən bəhs edir. Eyni zamanda kitabda Dağlıq Qarabağ Muxtar Vilayətində Azərbaycanın əleyhinə cərərəyan edən hadisələr və Ermənistanın Azərbaycana qarşı gizli oyunları barədə dolğun faktlar yer alıb.
Əlbətdə, bu kiçik qeydlərə Cəmil müəllimin ehtiyacı yoxdur. Həm də zəmanəmizin böyük aliminin elmi yaradıcılığına bir təbrik mətni ilə əhatəli işıq salmaq da mümkün deyil. Heç belə bir niyyətim də yoxdur. Sadəcə olaraq ölkənin bir fəal vətandaşı kimi öz mənəvi borcumu yerinə yetirmək istədim. O, sözün həqiqi mənasında müəllim adına şərəf gətirən bir aydındır.
Hörmətli professoru səmimi qəlbdən təbrik edir, möhkəm can sağlığı, hüzurlu uzun ömür və daha böyük uğurlar arzulayıram. Allah yardımçınız olsun, Cəmil müəllim!