Türkel Oğuz
Azərbaycan hakimiyyəti mənə qarşı o qədər rəzilliklər, o qədər haqsızlıqlar edib ki, mən yazmaqdan, danışmaqdan yorulmuşam, min bir dərdi ilə əlləşən cəmiyyət artıq adekvat reaksiya verə bilmir, ancaq rejim qanunsuzluq və şərəfsizliyin yeni rekordlarını vurmaqdan usanmır ki, usanmır.
Bu gerçəkdən də bir ilkdir. Bu vaxtadək baş verməyən rəzalətdir, ancaq mənə münasibətdə bu ilkə də imza atmaqda qərarlı görünürlər.
Oğlum Toğrul 11-ci sinfi bitirir. Arzusu Avropada keyfiyyətli təhsil almaqdır və artıq müraciət etdiyi universitetlərdən birinə (Almaniyada) qəbul olunub. Artıq Toğrulun tələbə adını qazanması ilə bağlı rəsmi təsdiq almışıq.
Ancaq mənim işimi, evimi, maşınımı, normal insan həyatımı əlimdən almaqla kifayətlənməyən repressiya rejimi yeganə övladımın həyatını da məhv etmək üçün hələ 2013-cü ildən başlatdığı iyrənc əməllərindən bu gün də əl çəkmək niyyətində deyil.
Oğlumun təhsil almasına imkan vermirlər, ölkədən çıxışını yasaqlayıblar.
Bu problemi həll etmək üçün dəfələrlə məhkəməyə müraciət etmişik. Birinci müraciətimiz artıq Avropa Məhkəməsindədir.
İkinci iddiamızı Nəsimi Rayon Məhkəməsi yenidən rədd edib.
17 fevral 2021-ci il tarixində Bakı Apelyasiya Məhkəməsində hakim Azad İmanovun sədrliyi ilə apelyasiya şikayətimizə baxıldı.
Məhkəmələr formal səbəb olaraq atasının uşaqla görüşmək hüququna istinaq edirlər.
Uşaq həmin “atanı” tanımır, “ata” uşağın necə böyüyüb 16 yaşa çatmasından xəbərsizdir. Hakimiyyətin sifarişilə 2010-cu ildə prokurorluq orqanı əməkdaşına yaraşmayan hərəkətlərinə göyə qovulduğu orqana bərpa olunmaq və insan alverinə görə məhkum olunmuş bacısını həbsdən qurtarmaq üçün uşağın yaşadığı mənzilini, uşağa xidmət edən avtomobili əlindən alır, uşağın anasına, yəni, mənə ən alçaq böhtanlar atıb məhkəmələrə çəkir.
Həmin “ata” 24.10.2014-cü ildə Nəsimi Rayon İcra Şöbəsinə ərizə ilə müraciət edib (surəti şərh bölümündə) oğlu ilə görüşdən rəsmən imtina edib və həmin tarixdən keçən yeddi il ərzində uşaqla görüşə bircə dəfə də cəhd etməyib! Cəhd etsə belə şüurlu, savadlı bir yeniyetmə 16 ildən və etdiyi bu rüsvayçılıqlardan sonra onu qəbul edərmi?!
Mülki icraat tərəflərin çəkişməsi prinsipinə əsaslanır. Təsəvvür edin ki, mən iddiaçı olaraq vəkilimlə prosesin bütün mərhələlərində iştirak edirəm, tələbimi əsaslandırıram, ancaq cavabdeh zəhmət çəkib məhkəməyə nə özü gəlir, nə nümayəndəsini göndərir. Çünki, gerçəkdə də, cavabdeh heçkimdir, prosesin iki tərəfi var- mən və mənim siyasi fəaliyyətimə görə mənə və hətta övladıma qarşı faşist metodları ilə, siyasi və mənəvi terror yolu ilə mübarizə aparan Azərbaycan hakimiyyəti.
Məhz ona görə də heç zəhmət çəkib məhkəməyə gəlmədiyi halda belə məhkəmələr uşağın həyatını məhv etmək hesabına karyera quran “ata”-nın xeyrinə qərar çıxarırlar.
17.02.2021-ci tarixində keçirilən apelyasiya baxışında hakimlərin özlərinin də çətin durumda olduğu görünürdü. Nüfuzlu Almaniya universitetinə daxil olmuş bir yeniyetməni ən önəmli hüquqlarından birindən- təhsil hüququndan məhrum etmək üçün heç olmasa “atacığazı” dartıb məhkəməyə gətirmək lazımdır ki, buna görə də iclası 24.02.2021-ci il tarixinədək təxirə saldılar.
Yeri gəlmişkən, eyni məzhəkə Ali Məhkəmədə də oynanılmışdı.
Hakim adına ləkə olan Gündüz Quliyevin sədrliyilə keçirilən kassasiya baxışı düz üç dəfə təxirə salındı. Cavabdeh məhkəməyə gəlmədiyi üçün. Hüquqşünaslar bilir ki, Ali Məhkəmənin praktikasında belə hal istisnadır, orada işlərə tərəflərin iştirakından asılı olmayaraq baxılır.
İddiaçı qismində mən çıxış etdiyim üçün müstəsna hal baş verdi və altı ay sonra, yalnız üçüncü cəhddən “atanı” iclasa gətirdilər, lakin “ata” yenə də Prezident Administrasiyasından verilən siyasi sifarişə o qədər arxayın idi ki, Ali Məhkəməyə vəkilsiz gəlmişdi. Ali Məhkəmədə keçirilən kassasiya baxışında vəkilsiz təmsil olunmaq elə təmsil olunmamaq deməkdir, çünki danışmaq, fikrini bildirmək, iddianı müdafiə və ya rədd etmək haqqın olmur. Ancaq “atanın” üçüncü iclasda peyda olub məhkəmə zalında beş dəqiqə səssiz oturması oğlumun təhsil hüququnun üstünlüyü, təhsilin insan həyatında önəmi haqqında mənim və vəkilimin səsləndirdiyi çoxsaylı arqumentlərdən və hüquqi əsaslandırmadan ağır gəldi və məhkəmə qərara aldı ki, elə həmin zalda əyləşən oğlu ilə hətta salamlaşmayan “atanın” uşaqla nə vaxtsa, məsələn, yaşıl ayın 32-də ehtimal olunan nəzəri görüş hüququ oğlumun təhsilindən və gələcəyindən daha üstündür.
Mən minə dözmüşəm, min birə də dözəcəyəm. Allah şükür ki, oğlum da möhkəmdir. Amma…
…Siyasi mövqeyinə görə rəqiblərinin övladlarından qisas almaq adi faşizmdır, mənəvi terrordur, cinayətdir.
Və bu cinayəti törədənlər mənim oğlumun yox, öz övladlarının gələcəyini yazırlar.
Sadəcə, kiçik bir zaman fərqi ilə.