Milli Şuranın Koordinasiya Mərkəzinin üzvü Gültəkin Hacıbəyli
Rusiya Dövlət Dumasının deputatı, “Ədalətli Rusiya” partiyasının rəhbəri Sergey Mironuvu soydaşlarımız yaxşı tanıyır. O, 2001-2011-ci illər arasında Rusiya Federasiya Məclisinin (parlamentinin) yuxarı palatasının- Federasiya Şurasının sədri olub. Putinin ən yaxın və güvənli adamlarından biridir.
O, II Qarabağ savaşımızın ilk günlərində “Rusiya sülhməramlıları Qarabağda yerləşdirilməlidir” açıqlamasını verdi və az sonra proqnozu gerçəkləşdi.
İndi isə Sergey Mironov bəyan edir ki, Qarabağ Rusiyaya birləşdirilməlidir və qarşıdan gələn parlament seçkilərində partiyasının seçki proqramına bununla bağlı bənd əlavə edəcəklər.
Mironov bu sərsəm iddiasını səsləndirəndən bir neçə gün öncə Putin SSRİ-dən ayrılan müstəqil dövlətləri kvazi-dövlət adlandırıb və bircə gün öncə qondarma rejimin parlamenti rus dilinə Qarabağ ərazisində ikinci dil statusu verib.
Bu qədər təsadüf ola bilərmi?! Oqtay Əsədovun, Sahibə Qafarovanın İlham Əliyevin iradəsinə zidd bir fikir səsləndirməsini, məsələn, “Borçalını Azərbaycana birləşdirməliyik” tipli bəyanat verməsini təsəvvür edə bilirsinizmi?!
Mironov Putinin dili ilə danışır, Rusiyanın niyyətini, məramını, ifadə edir. Pis niyyətini, pis məramını. Rusiya Qarabağa, Azərbaycan torpağına da həmin o pis niyyətdən çıxış edərək pisməramlı kimi gəlib, sülhməramlı statusunda yox.
Azərbaycan hakimiyyəti isə milli və dövlət maraqlarına qarşı bu açıq çağırışlara və təhdidlərə cavab vermək, etiraz etmək cəsarətində və istəyində deyil. İnadla susur.
Bir müstəqil dövlət öz suverenliyinə və ərazi bütövlüyünə qarşı yönələn belə açıq təhdidlərə necə susa, biganə qala bilər?!
Bəlkə Azərbaycan, gerçəkdən də, Putinin iddia etdiyi kimi kvazi-dövlətdir?!