Bəxtiyar Hacıyev
Bəziləri deyirlər ki, Ilham Aliyev Qarabağı alan müzəffər komandandır, onun nəyinə lazımdır kimlərisə özəl görüntülərlə şantaj etsin, özünə zərərdir axı. Şəkildə görülən yeni anons üzərində araşdıraq.
Bu ABŞ-dan alınmış virtual nömrələrlə mesajlar mənə ilk dəfə Gəncə icra başçısı Elmar Vəliyev güllələnəndə gəlmişdi. O zaman onlar başçıya güllə atan şəxsi polis bölməsində döymüşdülər və fotoları yayılmışdı. Rəsmi qurumlar açıqlama yaymışdı ki, fotodakı Yunis Səfərov deyil, biz də onun pasport fotosunu əldə edib, yaymışdıq. Bundan sonra Whatsappdan belə mesajlar gəlməyə başladı.
3 il əvvəldən bu günə qədər DƏFƏLƏRLƏ DİN, DTX-ya, Prezident Administrasiyasına bu barədə müraciətimiz olub, hətta bu mesajların göndərildiyi CİHAZ ID-sinə qədər tapıb, təqdim etmişik. Ən son bir neçə gün əvvəl DİN-ə təqdim etmişəm. Amma bu günə qədər guya bu mütəşəkkil dəstə tapılmayıb.
İnsanların, xüsusilə tənqidçilərin belə ləyaqətsiz, çirkin üsullarla şantaj edilməsi barədə milyonların sevimlisi, mənim də az-çox dəyərləri olan, savadı, bacarığı, insanlığı olan kadr kimi tanıdığım Hikmət Hacıyevə də məlumat vermişəm, amma araşdıracağını desə də, ondan da səs çıxmadı.
O zaman sual yaranır: bütün dünyanı qarşısına alıb, şəhidlərimizin qanı bahasına Qarabağın bir hissəsinin işğaldan azad olunmasını öz uğuru kimi təqdim edən (“ata vəsiyyətini yerinə yetirdim” deyərək) böyük komandan 3 il ərzində öz ölkəsində fəaliyyət göstərən belə mütəşəkkil kibercinayətkar qrupu tapa bilmir, yoxsa, əmr özündən gəlib, yoxsa, DİN, DTX, PA hamısı birləşiblər və müzəffər komandana qarşı işlər görürlər ki, o tarixdə müzəffər kimi yox, başqa cür yadda qalsın?
Əliyevin kişi tənqidçiləri barədə isə silsilə şantaj kampaniyası davam edir, Whatsappda anons verirlər, Telegramda kanallar açırlar və bu prosesdə qadınların özəl görüntülərini yayırlar, yaxud təhdid edirlər (həbsdə olan jurnalist Əfqan Sadıqovun xanımının da DTX-da bu məzmunda təhdid edildiyi barədə dünən məlumat yayıldı). Çox maraqlıdır ki, bu prosesdə birinci vitse-prezidentin katibliyi də səssiz qalıb, bu miqyasda iyrənc kampaniyanı səssiz izləyir.