AXCP Rəyasət Heyətinin üzvü Fuad Qəhrəmanlı
Baydenin Putini qatil adlandırması siyasi savaş elanı anlamına gəlir. Ancaq bu savaş rus xalqına qarşı deyil, Putin hakimiyyətinə qarşıdır. Putinin bu qarşıdurmada işini çətinləşdirən odur ki, rus xalqı onun deyil, Baydenin müttəfiqi kimi çıxış edir. Ona görə də o, iki cəbhədə mübarizə aparmağa məhkumdur.
ABŞ-n Rusiyaya qarşı geosiyasi savaşının beynəlxalq səviyyədə dəstək qazanması üçün tam legitim əsasları var. Bu Rusiyanın postsovet məkanında həyata keçirdiyi işğal siyasəti və Avropanın təhlükəsizliyi üçün təhdid yaratması, Orta Şərqdə sabitliyə mane olması ilə bağlıdır. Bunu əsas götürən Bayden administrasiyası Rusiyaya qarşı Transatlantik ittifaqının bazasında koalisiya formalaşdırmağa çalışır. Artıq İngiltərə öz müdafiə və xarici siyasət strategiyasının bəzi aspektlərini açıqlayıb. İlk dəfədir ki, Sovet İttifaqının çöküşündən sonra İngiltərə dövlətinin qlobal vizyonunu əks etdirən belə bir sənəd hazırlanıb.
Sənəddə Rusiya İngiltərənin milli təhlükəsizliyi üçün əsas təhdid hesab olunur və bu təhlükəyə qarşı ABŞ-la strateji müttəfiqlik nəzərdə tutulur. Bu artıq rəsmi olaraq Rusiya qarşı güclü Anqlosakson birliyinin yaranması deməkdir. Bu birlik hesabına Bayden Avropa Birliyinini də Rusiyaya qarşı ABŞ-ın siyasətinə dəstək verməyə sövq etməyə çalışır.
AB-nin əsas aparıcı gücü olan Almaniyada rəy sorğularında ikinci yeri tutan Yaşıllar Partiyasının “Şimali Axını 2” layihəsi ilə bağlı ABŞ-n sanksiya siyasətini müdafiə etməsi onu göstərir ki, soyuq müharibə illərində olduğu kimi, böyük Qərb koalisiyasının yaranması çox da uzaqda deyil. Almaniyada payızda keçiriləcək seçkilərdən, Yaşıllar Partiyası hökumət ortağı olandan sonra bu məsələ daha da qətiləşəcək.
Dünən isə Avropa Birliyinin xarici siyasət komissiyasının nümayəndəsi Massrali media açıqlamasında Co Baydenin Putinə dediyi “qatil” sözünə haqq qazandırıb. “Rusiyada siyasətçilər və jurnalistlərə qarşı törədilmiş sui-qəsdlərinin uzun bir siyahısı var…Rusiya prezidenti baş verən hadisələrə görə cavabdehdir”. Bu mövqe onu göstərir ki, Avropa Birliyinin Putininə münasibətdə ABŞ – la həmrəydir. .
Hazırda Bayden hakimiyyəti Rusiyanı zəiflətmək strategiyasını üç istiqamət üzrə həyata keçirilir.
- Putinin yaxın çevrəsinə sanksiyalar qoymaqla siyasi elitanı zəiflətmək və bu yolla da komanda daxilində mərkəzdənqaçmaya yol açmaq. Digər tərəfdən də hərbi sənaye, energetika, maliyyə sektoruna tətbiq olunan sanksiyaları tədricən genişləndirib, ölkə iqtisadiyyatını böhrana salmaq nəzərdə tutulur. Bu da öz növbəsində ölkə daxilində sosial iqtisadi gərginliyi dərinləşdirərək xalqın Putin hakimiyyətinə qarşı artan narazılığını daha da genişləndirməyə hesablanıb.
- ABŞ Rusiyanın imperial iddialarını uğursuzluğa uğratmaqla, onun postsovet məkanında işğal etdiyi ərazilərdən çıxmasına nail olmağa çalışır. Artıq məlum olduğu kimi, Rusiyanın işğal etdiyi Şərqi Ukrayna ərazilərindən çıxarılması üçün bu ölkənin ordusunun modernləşməsinə və müasir texnika ilə təmin olunmasına ciddi dəstək göstərilir. Eyni zamanda azad etmə əməliyyatlarına hazırlıq kimi bu ölkədə fəaliyyət göstərən Rusiyaya bağlı 5-ci kalonun sıradan çıxarılması istiqamətində çox mühüm addımlar da atılmaqdadır. Ukrayna bu məsələdə ən mühüm strateji önəm daşıdığı üçün hələlik diqqət onun üzərində cəmlənib. Sırada isə digər işğal olunmuş ərazilərlə bağlı məsələlər də var.
Məlum olduğu kimi, Putin hakimiyyətinin əsas ideoloji əsaslarından biri də yeni ərazilərin işğalı hesabına böyük Rusiya idealını gerçəkləşdirmək olub. Bu yolla rus millətçiliyinin emosional təsiri ilə cəmiyyətdəki sosial narazılıqların önü kəsilirdi. Məhz bu səbəbdən də Rusiyanın işğal etdiyi ərazilərdən sıxışdırılıb çıxarılması bumeranq effekti yaradaraq, Putinin son dayağını da sıradan çıxara bilər. Buna görə də Putin ABŞ-n bu məqsədin aqressiv reaksiya verərək, keçmiş Sovet respublikalarını oyuncaq dövlətlər adlandırıb, onların suverenliyinə hörmət etmədiyini və dolayı yolla tutduğu ərazilərdən çıxmaq istəmədiyini dilə gətirdi. Bu isə konfrantasiyanın hərbi qarşıdurma istiqamətində dərinləşə biləcəyi anlamına gəlir. NATO-nun hərbi gücü qarşısında belə bir qarşıdurma birmənalı şəkildə Rusiyanın ziyanına olar. Bu yaxınlarda NATO-nun baş katibi Stoltenberqin “gərəkirsə Rusiyaya hərbi cavab veriləcək” mesajı əslində Putinin aqressiv ritorikasıının bu dəfə bir işə yaramayacağını göstərir. Obama və Trampın dişsiz siyasəti dönəmində bu ritorikadan bəhrələnən Putinin aqressiv davranışları indi nəinki qarşı tərəfə təsir göstərmək gücündə deyil, əksinə, qarşıdurmanı daha da dərinləşdirməyə xidmət edir. - Putin üçün ən təhlükəli məsələ daxildə xalq etirazlarının genişlənərək hakimiyyətin nəzarətindən çıxması ola bilər. Bu səbəbdən də ABŞ müxalifət lideri Navalnının həbsinə və Rusiyada xalqın etiraz hüququnun tanınmasına xüsusi önəm verir. Qərb Rusiyadakı etiraz aksiyalarını açıq şəkildə dəstəkləməklə və Navalnını müdafiə etməklə Putinə qarşı demokratiya kartından təzyiq vasitəsi kimi istifadə edir. Navalnının Putinin korrupsiya əməllərini ifşasından sonra vətənpərvər imici dağılan Putin oğru kimi ictimai qəzəb hədəfinə gəlib. Belə bir vəziyyətdə Qərbin demokratiya tələblərinə qarşı vətənpərvərlik şüarları arxasında gizlənib, manipulyasiya etmək daha mümkün deyil. Bu səbəbdəndir ki, artıq Moskvada sosial şəbəkələri məhdudlaşdırmaq istiqamətində mürtəcə təkliflər ortaya atılıb. Və belə görünür ki, Putin aqibəti faciəvi sonlanmış digər diktatorların yolu ilə gedərək, irtica hesabına cəmiyyətin tələblərini önləməyə hazırlaşır. Ancaq demokratik Qərblə qarşıdurmanın yaratdığı problemlər Rusiya kimi böyük ölkədə xalqı bu yolla uzun müddət nəzarətdə saxlamağa çətin ki, imkan versin.