AXCP Rəyasət Heyətinin üzvü Fuad Qəhrəmanlı
Rusiya müdafiə nazirinin müavini Dmitri Bulqakovun bu günlərdə Dağlıq Qarabağa səfəri Rusiyanın Azərbaycan ərazisində hərbi baza yaratması ilə bağlı deyilənləri təsdiq etdi. Bəlli oldu ki, Rusiya Dağlıq Qarabağda hər biri 250 nəfərə olmaqla əlavə 25 modul tipli kazarma inşa etmək niyyətindədir. Bu isə Qarabağdakı Rus hərbçilərinin sayının artırılaraq, 10 min nəfərin üzərinə qaldırılacağına hazırlıq getdiyini göstərməkdədir. Halbuki 10 noyabr Bəyanatında 1960 sülhməramlı kontingent yerləşdirilməsi nəzərdə tutulurdu.
Rusiya Azərbaycan tərəfindən heç bir hərbi və siyasi müqavimət görmədən, çox rahat şəkildə ordusunu ərazimizdə yerləşdirərək, yumşaq formada işğal siyasətini həyata keçirir.
Bu baxımdan Rus dilinin Dağlıq Qarabağda dövlət dili elan edilməsi və Rusiya pasportlarınln paylanılacağı ilə bağlı xəbərlər fonunda Azərbaycan tərəfin hazırkı susqun münasibətini heç nə ilə əsaslandırmaq olmaz.
Bu gün baş verənlər onu göstəririr ki, əslində 44 günlük müharibə Putinin planı olub və 7 rayon rus ordusunu Azərbaycan ərazisinə gəlişinə əsas yaratmaq üçün azad edilib.
O da məlum olur ki, İlham Əliyevin Dağlıq Qarabağın müstəqillik statusunun “gorba – gor” olduğunu deməsi də Putini bu günkü planına uyğun olub. Necə? İndi aydın olur ki, Rusiya Dağlıq Qarabağdakı ermənilərin Azərbaycandan ayrılaraq müstəqil olmasını deyil, məhz özünə aid olan bir anklava çevrilməsin istəyirmiş. Putinin yaxın çevrəsindəkilərin son açıqlamaları və rus mediasında bununla bağlı səslənən iddialar da, elə bu işğal planına zəmin yaratmağa xidmət edir.
Azərbaycan hakimiyyəti bu gün Rusiyanın Dağlıq Qarabağda öz ərazisindəki kimi davranmasına və ölkəmizin suverenliyini heç saymasına susqun yanaşdıqca, bu, Rusiyanın etdiklərini qəbullanmaq anlamına gəlir.
Bütün baş verənlərin fonunda indi söz xalq olaraq bizimdir. Fərq etmir kimimiz müxalifətdəyik , kimimiz iqtddarda, kimimiz də siyasətdən uzaq öz həyatımızı yaşayırıq. Millətimizin heysiyyətinə toxunan, suverenliyimzi tapdayan, milli maraqlarımıza və təhlükəsizliyimizə qarşı olan Rusiya işğalına qarşı bu gün bütün mili qüvvələr həmrəylik göstərməlidirlər. Bu həmrəylik açıq aşkar olmasa belə, hər kəs öz olduğu vəzifədə, fəaliyyət sahəsində Moskvanın işğal siyasətinə qarşı milli müqavimət cəbhəsinin formalaşmasına, açıq və ya gizli öz dəstəyini göstərməlidir.
Vətən bizim siyasi maraq və dünya görüşlərimizin fövqündə olan ortaq və müqəddəs dəyərimizdir. Onu qorumaq, öz merkantil maraqlarına görə onu satanların planlarını pozmaq, ona olan təhlükələrə qarşı fədakarlıqla mübariz aparmaq bizim boynumuzun borcudur.