Milli Şuranın Koordinasiya Mərkəzinin üzvü Rafiq Manaflı
Demokratiyanı, insan hüquqlarını hər bir dövlətin daxili işi hesab edən və bu düşüncə ilə özünü demokrat adlandıran “siyasətçilər” boşboğaz xorudur, başqa heç nə. Mənim üçün elementar siyasi baqajı olmadan harda aş orda baş olan belə “demokratlar”la İlham Əliyevin heç bir fərqi yoxdur.
Demokratiya, insan hüquqları ona görə heç bir dövlətin daxili işi deyil və ola da bilməz ki, dövlətin bütün siyasi, iqtisadi, güc resursları həmin ölkə hakimiyyətinin əlindədir. Hər bir rejim ölkə daxilində istinasız və intəhasız güc tətbiqinin yeganə monopolistidir və məsələn, Əliyev kimi, Putin kimi, Lukaşenko kimi diktatorlara qanad versən uçurmadığı dam-daş qoymazlar. Necə ki, bütün beynəlxalq hüquqlara tüpürən Kim Çen In uçura-uçura gedir.
Demokratiyaya, insan hüquqlarına, qanunun aliliyinə bu dəyərlərin hakim olduğu demokratik ölkələr mənimçün neyləyib kimi dar çərçivədən baxmaq qədər dar düşüncə sahibləri necə dayanmadan absurd izhar etməkdən utanmaya bilirlər. Sən neyləmisən onlar üçün? – kürü, rüşvət verib dəngələrin pozmusan, harda izqoy var onun yanında olmusan, müstəqil mətbuatı məhv etmisən, məhkəmə sistemin sifarişsiz nəfəs ala bilmir, zindanların da siyasi dustaqla dolu.
Demokratik ölkələr Qarabağ probleminə dəstək verib neyləməliydilər? Gəlib sənin əvəzinə vuruşub torpaq almalıydılar? Demokratik dünya 4 qətmanə ilə sənin ərazi bütövlüyünə dəstək veriblər. Deyiblər torpaq sənindir, get al. Və alanda da sənə dəstək nümayiş etdiriblər. ABŞ kimi dünya düzənini müəyyənləşdirən supergücün bitərəf qalmasının sənə dəstək nümayişi olduğunu qanmayacaq dərəcədə naşısansa, nə əlaməlik edirsən? Baxmayaraq ki, ABŞ daxilində erməni diasporunun kifayət qədər hiss ediləcək pressinqi var. Erməni xarici diplomatiyası orada öz dövlət maraqlarından çıxış edib, səninki kimi rüşvət verib ailə maraqlarını müdafiə etməyiblər.
Maraqlıdır ki, bu dialoq avtobusunun bəzi sərnişinləri özləri məhbəsdə siyasi məhbus həyatı yaşayanda gözləri beynəlxalq hüquq təşkilatlarının, Avropa qurumlarının, ABŞ dövlət departamentinin ağzında idi, dialoq avtobusuna minən kimi demokratiya hər dövlətin öz daxili işi oldu. Amma təəccüblü deyil, nədənini biz də çox gözəl bilirik, onlar özləri də.