Milli Şuranın sədri, professor Cəmil Həsənli
“Sərhədsiz repartyorlar” dünən dünyada mətbuat azadlığı indeksini açıqladı. “Azadlıq” deyəndəki həmin azadlığın bizim ölkəyə o qədər də dəxli yoxdur. Çünki Azərbaycan həmin azadlığın rəng çalarlarında 13 avtoritar ölkələrlə birlikdə qara rəngdə öz yerini tutub. Günçıxanda Şimali Koreya, günbatanda Kuba, cənubda Kaşıkçını mişarla doğrayan Saud krallığı, Şimal isə bizdən bir addım qabağa gedərək qırmızı rəngə bürünüb. Niyə Azərbaycan dünyanın mətbuat azadlığı indeksində qara coğrafiyada qərar tutub. Ona görə ki, bir el məsəlində deyildiyi kimi qaradan artıq rəng yoxdur. Olsaydı şübhəsiz ki, orada qərar tutardıq. Çünki mətbuata münasibətdə İlham Əliyevin üzü pullarını mənimsədiyi ölkə uşaqlarının qarşısında olduğundan da qaradır.
Ölkənin belə qara siyahılara düşməsi şübhəsiz ki, mətbuata qənim kəsilən İlham Əliyevin qara-qura işləri ilə bağlıdır. Adam istəyir həm oğurluqla, həm büdcə talançılığı ilə, həm “şapka və otkat” əməliyyatları ilə, həm ölkənin müdafiə xərclərini ailə ofşorlarına daşımaqla, həm günahsız insanlara torba tikməklə məşğul olsun, həm də heç kəs bunu “görməsin”, heç kəs onun natəmiz əməllərindən yazmasın. Adam özün və ailəsin bu natəmiz əməllərdən islah etmək əvəzinə mətbuatı boğub ölkəni qara siyahıya saldırır, azad sözü dar ağacına çəkir.
Vaxtıyla Heydər Əliyevin mətbuat haqqında anlayışı “Pravda” və “İzvestiya” qəzetlərindən keçdiyi kimi, İlham Əliyevin mətbuat anlayışı hər gün onun haqqında vəzifəli şəxslər, tabeçiliyində olan adamlar tərəfindən yazılmış diframbaları palazlayan “Azərbaycan” və “Yeni” variantından keçir. Son 6 ayda İlham Əliyev haqqında bu qəzet qırıqlarında gedən yazılara diqqət yetirilsə Böyük Vətən Müharibəsindəki qələbədən sonra Stalin haqqında Sovet mətbuatında bu qədər vəsfedici yazılar getməmişdi. Qəlbəni qazanan xalq, canın fəda edən əsgər və zabit qalıb bir tərəfdə, İlham Əliyevin “həşəmətli müdrik sərkərdə” obrazını xalqa sırımaqla məşğuldur mətbuatın üzünü qara edən bu qəzetlər.
Manşetlərə diqqət edin: “İLHAM ƏLİYEVİN QƏLƏBƏLƏRİ”, “Zamanın bayraqdarı”, “Dəmir yumruq abidəsi”, “Uğurlarımızın memarı”, “Zəfər sərkərdəsi”, “Qalib dövlətin Zəfər simvolu”, “Söz və yüksək nüfuz sahibi” və sair. Ölkə mətbuatı şəxsiyyət(sizli)ə pərstişi təbliğ edən belə yazıları ilə mətbuat indeksində ayrı rəngdə görünmək istəyir. İnformasiya azadlığı indeksində qara coğrafiyada yer tutan bir ölkənin qəzeti mətbuatın üzünü qara etmiş İlham Əliyevi”İnformasiya savaşının sərkərdəsi” adlandırır.
Ayrı bir başlıqda deyilir ki, “İlham Əliyev postsovet məkanının ən savadlı, ən mədəni Prezidentidir”. Adam atası Siyasi Büronun üzvü ola-ola Moskva Dövlət Beynəlxalq Münasibətlər İnstitutunda (MDBMİ), oxuya bilməyib və onu himayədarlıqla Kievdə müvafiq instituta keçiriblər, MDBMİ institutunun kollektivi İlham Əliyev üçün saxta dissertasiya işi yazdırdığına görə rektor Lebedevdən Mərkəzi Komitəyə kollektiv şikayət verdilər (Bax: РГАНИ, ф.100, оп.5, д.1238, л.26) və faktlar təsdiq olunduğu üçün 1985-ci ilin dekabrında Nikolay Lebedevi rektorluqdan və Sov.İKP üzvlüyündən azad xaric ediblər, indi adam olur postsovet məkanının ən savadlı prezidenti. Sual olunur əgər postsovet məkanının ən savadlı prezidenti İlham Əliyevdirsə, bəs o birilər nə gündədir?