Qaşqay İsmayıl
Bir sıra Qərb iqtisadçılarının fikrincə, hər hansı ölkənin yoxsulluqdan xilas olmasının əsas şərti, iqtisadiyyata böyük məbləğdə maliyyə vəsaitlərinin cəlb edilməsidir. Demokratik təsisatlar, konstitusiya islahatları, xalqın aparıcı rolu və sair kimi faktorlar nə qədər yaxşı səslənsə də, həlledici rol iqtisadiyyata cəlb edilən investisiyalardan asılıdır
Bu baxımdan offşorlara milyardlarla dolların çıxarılması, yaxud xaricdə daşınmaz əmlaka, yaxtalara və təyyarələrə yatırılması, həmin ölkə üçün gec-tez faciə ilə nəticələnir
Yuxarıda deyilənlərə əsaslanaraq, Azərbaycanın neft bumu illərində özünün unikal şansını əldən verdiyini deyə bilərik. Ölkəyə daxil olan nəhəng miqdarda valyuta-neft və qaz gəlirləri, eləcə də kreditlər və xaricdən göndərlən pul vəsaitləri ölkədə müvəqqəti iqtisadi canlanma yaradaraq, offşorlara yönəldilirdi. Həmin məbləğin müəyyən qisminin investisiya olaraq ölkədə qalması, bir çox problemlərin həlli demək olardı. Əhalinin pul gəlirlərinin minimal həddə olması, alıcılıq qabiliyyətinin aşağı düşməsi səbəbindən ticarət və xidmətin ilbəil zəifləməsi ilk növbədə iqtisadiyyatın puldan korluq çəkməsinin nəticəsidir. Təsadüfi deyil ki, son 5 ildə həyat səviyyəsinə görə, Azərbaycanın Cənubi Qafqazda lider olmadığını, sadə insanlar da görürlər
Təəssüf ki, iqtisadiyyatın pul vəsaitlərinə kəskin ehtiyac duymasına səbəb olan iqtisadi kurs, indi də inflyasiya və devalvasiyasının qarşısının alınması məqsədilə davam etdirilir, iqtisadiyyat tamamilə dondurulur və əhalinin pul gəlirləri təbii olaraq yoxa çıxır. Büdcədən qidalanan təbəqənin hakimiyyətə loyallığını qorumaq məqsədilə yürüdülən bu kurs, ölkə iqtisadiyyatını tamamilə sıradan çıxarmaqdadır.